MP rual hmaah ramri hung duh loh thu thlen

Parliament Budget Session neih tur inbuatsaihnaa sawrkar laipui hotu thenkhat leh MP rual hmaah Mizoram MP K Vanlalvena chuan Indo-Myanmar ramri hung a duh loh thu a sawi.
Parliament Library building-a all party leader meeting-ah Rajya Sabha MP K Vanlalvena hian Indo- Myanmar ramri hung tumna awm chu thulh a tul tih sawiin, “Colonial period-ah British roreltuten Mizote chenna ram chu hmun thum – India, Bangladesh leh Myanmar-ah min thendarh a, insuihkhawm leh hlan nghakhlel taka kan thlir reng lai a, Indo-Myanmar ramri hung hi kan political goal tih hlawhchhamna tur a nih theih avangin tih loh tur a ni,” a ti.
Bangladesh ramri hung pawh Mizoram khawthlang lamah siam ni tawhin, a hmuna a tlawh tawh thu te, khaw thenkhat phei chu fencing pawnah a awm thute, ramri lui thui tak sangha manna hmun tha tak tak hung pawnah dah a nih thu leh, Mizorama Indo – Bangladesh border fencing chu thiah leh a tul thu te a sawi.
“Myanmar sipai sawrkar a chak lo tial tial tawh a, Chin Hills mipui nen kan inkungkaih thuk tial tial a, Indo-Myanmar ramri hung kan duh takzet a nih chuan Chin state pumpui huam vekin kan hung tur a ni,” K Vanlalvena hian a ti.
All Party meeting hi Union Defence minister Rajnat Singh chuan a kaihruai a, Parliamentary Affairs minister pahnih Pralhat Joshi leh Piyush Goyal ten an kaihruai ho a ni.