ZPM-in chhimlam a ngaihthah – C Ngunlianchunga

ZPM sawrkar chuan chhimlam leh chhim mi a ngaihthah hle nia a hmuh thu Congress MLA C Ngunlianchunga chuan a sawi.
Thawhlehnia Siaha Congress Bhavan-a inkhawmah Lawngtlai West bialtu MLA hian ZPM party chuan BJP tanpuina a dawng ngei nia a lan thu sawiin, “Mizo upaten ‘pân loah tho a fu ngai lo’ an lo tih thin kha a dik viau,” a ti. An hla key lakna a sang hle a, an inzawrh dan angin an awm em tih an thlir anga, anmahni budget siam thlir ve phawt ila, Mizo mipui rin ang an ni dawn em, tih an thlir anga, mipui beisei an pha lo a nih chuan paih leh mai tur a ni tih a sawi.
ZPM sawrkarah chhimlam mi, minister ni ve awm tak takten minister dinhmun an chang pha lo chu a pawi tih sawiin, “Chhimlam bial hmasawnna ka ngaihpawimawh anga an ngaipawimawh lo hi pawi ka ti hle. Mite min sawi thin danah Ngunlianchunga chuan chibil politics a khel a, chhim lam ringawt a buaipui, min ti thin. Mah se, Vairengte atanga Tongkolong hian hma sawn se, chhimlam chauh niloin ram pumah hmasawnna hi rualkhai takin kal se ka duh vang zawk a ni,” a ti.
District Council sum min pek dan thlirletin Congress sawrkar chu chhim lam tan a hlu hle a. MNF nena khaikhin chi pawh an ni lo tih Congress MLA hian a sawi. “Tun dinhmunah ZPM-in helam ngaihsak tura nihna a pek san ber chu adviser to chief minister (Health) a ni a. Health minister pawh ni lo, CM adviser-a an dah hi awmzia a awm lo hle. Chhimlam min hmuh hniam zia a langchiang a ni,” a ti.