Pakistan inthlan turin ngaihven hlawh

Pakistan chuan a hun la tawn ngailoh tawng mekin thinrimna, lungawilohna leh beiseina te chu a invialchiat mai.
Muslim-majority ram mipui maktaduai 241 awmna chuan a zawna tum thum nan civilian parliament vote an thlak leh dawn a. Pakistan-ah hian prime minister a term hmang zo an la awm ngai lo, chumi piah lamah sipai rorelna leh dictatorship a khat a ni.
February 8 ah inthlanna an nei dawn a, mahse, sipai te inrawlhna nasa tak a awm mek tia sawi a ni.
Pakistan inthlan hi sawisel awm lovin a la awm ngai hauh lo bawk a, mahse, kumin hian a nsa zual bika ngaih niin a chhan ber pawh prime minister hlui pakhat chu lung ina khung mek niin a chuh ve thei lo va, pakhat dang chu Paksistan tlanchhiatdana ram danga awm mek a ni bawk.

Eng vangin nge tun inthlan a pawimawh?
Pakistan chu India hmelma kumhlun a ni, chubakah Iran leh Taliban thunun Afghanistan nen ramri nei niin USA nena inkawmngeih leh inngeihleh lo reng bakah China nena inthiantha an ni bawk. Pakisan chu nuclear ralthuam nei ram a ni bawk.
Tun hnai kumah Pakistan politician te chuan thuneihna chang turah inchuhna nasa tak an nei chamchi a. Prime Minister thlantlin hnuhnung ber Imran Khan chu kum 2022 khan an paihthlaa coalition sorkar a piang zui a.
Coaltion sorkar chu nikum August thla khan unelected caretaker sorkar in a thlak a, nikum November thla kha inthlan thatna neih hun tawh a ni a, tihkhawtlai niin tunah erawh inthlanna neih a ni dawn ta tak tak a ni.
Pakistani te chuan sorkar ngelnghet an duh ber a, a bik takin tun hnaia Iran nena inbakaihna an neih te, an ram sum dinhmun chhe lutuk avang te in sorkar ngelnghet neih an duh a ni. Mahse, a landanah chuti maia sorkar ngelnghet neih chu thil awlsam a ni dawn hauh lo.
Pakistan prime minster tum thum ni tawh Nawaz Sharif chu kum 2018 inthlanah khan lung in a tan avangin leh London apartment a neih danah eirukna nasa tak a awm tia puh a nih avangin inthlan a chuh remtihloh a ni a.
Kum ruk hnuah London a aluxury flat a a tawmbo hnuah Sharif chu a let leh tawh a. A unauna chuan a awm loh laiin PML-N party chu lo kaihruaiin kum 2022 a Imran Khan paihthla tu a ni bawk.
Tun hnai lawk thla hnih lekah kum 2024 inthlan hma lawkin Nawaz Sharif puhna tin te lak ata thiamchantirin a awm ta vek a ni. Sharif chuan Khan leh Pakistan sipai te inhmuhthiamloh hnuah sipai te nen a rukin inremna an siam tia puh niin a tum li nan prime minister ni leh thei dinhmunah a ding a ni.
Mahse Sharif chuan Pakistan a thiltithei em em sipai te chu a hrechiang hle, prime minster term thum a chelhna kum 2013 a intan hnu lawk khan paihthlak in a awm a, a term hnihna pawh kum 1999 khan sipai ten an paihthla tawh bawk.
Kum 71 a upa cricker atanga politician a lut Imran Khan erawh kumin inthlanah a chuh thei dawn lo, a chhan chu lung in a tan vang niin amah thlawp tute chuan Imran Khan thubuai chu politics a inphiarrukna tiin an sawi.
Imran Khan an thuneihna a chan theihna ber tia an sawi chu sipai tena an thlawp vang tia sawi a ni a. Kum 2018 inthlanah khan opposition te chuan Imran Khan chu army chief te thlawp rawn tiin an puh.
Kum 2018 khan Imran Khan a Pakistan Tehreek-e-Insaf (PTI) party chu danglamna siam tur party tia sawi niin dynastic politics titawpa eirukna nuaibo leh judiciary reform a thalaite tana hna tautet siama economy siamtha tura ngaihna a lian hle.
Mahse Imran Khan rorelna hnuaia Pakistan economy a talbuai a, cost of living a sang a, politics lama a hmelma tam tak lung in ah khungin media zalenna dancheoa awmin human rights bawhchhiatna leh journalist te laka hleilenna a nasa zawk.
Khan chu Pakistani Taliban te nena inremna an siam avangin sawisel a hlawh hle bawk a, chubakah Afghanistan a Taliban rorelna chu a pamwpui bawk a ni. Imran Khan thlawptu ten an rauhsan nasat em avangin in candidate pawh ni se a tling zo lovang tiin thenkhat chuan an sawi.
Mahse Gallup poll tena January 2024 a poll an lak an tihchuah chuan Pakistan a politician lar ber chu Imran Khan la ni tho in Sharif chuan a hnaih hle thung.
Harsatna awm ta chu PTI te chu hrekin a awm thung a, campaign tak tak tur pawhin an leader lawk zual te chu lung in ah khung deuh vekin an awm a, an candidate te pawh independent a an din angai vek bawk a, an party symbol cricket bat pawh hman phalsak loh an ni bawk.
Kum 35 leka upa Bhutto-Zardari, Pakistan People’s Party (PPP) chairman a awm bawk a, inthlan hnuhnung berah khan pathumna a nihpui thung.
Oxford a zirchhuak prime minister hlui Benazir Bhutto kum 2007 a tihhlum tak leh president hlui Asif Ali Zardari fapa hi Imran Khan sorkar paihthlak a nih hnua coalition sorkar-ah khan foreign minister a ni.
Tun inthlan turah erawh an party chuan manifesto hrawl tak siamin hlawh a leta tihpun te, mihausa te laka tax tam zawk laka economy tha zawk asiam te an zuar mek a. Mahse, heng an manifesto te chu an chakpui zo dawn chuang lova ngaih niin mahse sorkar siamna turah kingmaker a nih tir thei tih a ni.