Hyderabad-a inzir tur leh hna thawk turte chah

Hyderabad-a lehkha zir tur emaw hna thawk tur emaw chuan a awmsate hnenah an kalna tur dinhmun hrechiang hmasa thin turin Hyderabad Mizo Association (HMA) chuan an chah a. HMA-a tel an nih chuan an hriat tur hrang hrang an sawi lawk bawk.
HMA thuchhuak chuan, Hyderabad-a awm tur chuan an thlen hmain an kalna tur zirna in emaw hna a ni emaw, a lo awmsate atanga information mumal tak neih hmasak tum turin a chah a. Tunlaiah inbumna hrang hrang a tam tawh avangin heng laka an fihlim theihnan an kalna tur hmun zirchian ngei tura chahin, hemi atan hian zirna in hrang hrangah zirlai biakpawh tur kumtin siam thin a nih bakah hnathawk turte pawhin a thawksa emaw hruaitute emaw biakpawh theih a ni tih a sawi.
Eng vang pawha kal ni mah se, chhiatni thatnia an belh theih tur zingah ngampa ngei turin an ngen a, mahni tlat tlata tla mailo leh hnamdang zinga pilbo mai lo turin an ngen lawk. Chutiang bawkin a lo awmsa an rawn belhten kal tharte enkawl kawngah mumal taka an chanchin hriatpui tum thin turin an ngen a ni.
‘HMA hian Hyderabad-a Mizo awm zawng zawng a huam rualin, mahni duhthu ngeia pawl zawm lo chu enkawl leh chhawmdawl a tum loa, hei vang hian pawl member-a inziaklut chauh a huam a. Member-a kan inziahluh chuan pawl inkaihruaina dan, pawl hmalakna kan pawm tihna a ni a, member awmtha duhlo leh zilhhau tawk, zilhhauna zawm lo chu member an nihna hlihsak theih an ni a, chutianga hlihsak leh mahni duhthua pawl member ni lo chuan hun dangah pawl hmalakna leh tanpuina an beisei thei lo ang,’ a ti.
Ram leh khawtlang dan bawhchhe zawnga chetna reng reng a do tlat tih HMA hian sawiin, ‘Chutiang kawnga hming lang theiah zu leh ruihtheihthila inhnamhnawih avanga buaina, ruk ruk leh sum leh pai kaihhnawih inbumnaa inhnamhnawih avanga buaina, hna leh zirna kawnga kan chet fel loh avanga buaina, mimal leh mimal inkara inhmuh thiamlohna chhan mumal lo – ngaihzawng thuhla, insual buai thuhla angah Hyderabad Mizo awmte inhnamhnawih lo turin kan ngen a, heng buainaah hian pawl hmalakna beisei lo turin kan ngen,’ a ti.
HMA din chhan ang taka tanpui ngai, harsatna tawk an awm chuan tanpui a, penchhuak turin an inpeih reng tih a sawi a ni.