US leh Britain ten Houthi te bei zui zel

United States leh Britain te chuan Yemen a Houthi target te chu an beihchhunzawm zel a, hei hi a chhan ber chu Iranian thlawp Houthis tena Israel-Hamas indona denchhen leh kaihhnawiha American leh international interest an beih chunzawm zel vang a ni.
Houthis te beihna thar ber hi warship leh fighter jets te hmanga kalpui a ni a. A hma lawk February 2 khan Iraq leh Syria a Iranian-back militia leh Iranian Revolutionary Guard te hmun te chu drone hmangin an lo bei tawh bawk a. Hei hi karkalta lawka US hmunpui Jordan a mi beihnaa US sipai pathumin nunna an chanphahna phuba lakna kalzel a ni.
Houthi target te hi hmun 13 lai niin US F/A-18 fighter jets te chuan USS Dwight D. Eisenhour aircraft carrier leh USS Gravely leh USS Carney Navy destroyer-te chuan Tomahawk missile te Red Sea atangin an kapchhuak tiin US official te chuan an sawi bawk.
US chuan Jordan-a Pathianni hmasa kaltaa Tower 22 beihnaa a sipaite thihna a phuba lakna chu zan khat thil thu lek emaw target khat emaw group khat chauhah a tawk dawn lo tiin a lo sawi lawk tawh a ni.
Houthis te hian nitin deuhthaw Red Sea leh Gulf of Aden a lawng te chu bei ve thungin hei hi Hamas te an thlawpna an lantirna a ni a, US in a beihna avangin engtiang chiahin nge an tawrh erawh hriat theih a la ni lo.
Defence Secretary Lloyd Austin chaun thuchhuah a siamah an hmalakna chu Australia, Bahrain, Canada, Denmark, the Netherlands leh New Zealand ten an thlawp tlat tiin a sawi bawk a. Houthis te chuan dan kalha international shipping leh naval vessels te an beilui zel a nih chuan a sawhkhawk an tuar nasa tial tial ang a ti bawk.
“Nunna chhanhim nan leh khawvel lawng kawng pawimawh venhimah kan tim dawn hauh lo” tiin Austin chuan a sawi a.
Defence Department chuan houthis te weapon storage facility, missile system leh launchers te bakah air defense system leh radar te an thlurbing tiin a tarlang bawk.
Tihan US leh Britain te chuan Houthi weapon launcher te tum thum bei tawhin an radar dahna te leh drone te pawh an vaihma tel bawk bawk a. Yemen a Houthi te beihna hi Washington in US leh international interest kalha chetlaknaah Iran chu mawhphurtuah ngaih a nih zia lantirna anga ngaih a ni.
February 2 khan US destroyer Laboon leh F/A-18 Eisenhower a awm te chuan Houthi te thunun Yemen atanga Red Sea a drone kahchhuah an kapthla a, destroyer Carney chuan Gulf of Aden a drone a kapthla bawk a, drone dang pali tirhchhuah tum mek chu tihchhiatsak an ni bawk.
A hma lawk pawhin US chuan anti-ship cruise missile paruk Yemen a mi chu a tihchhiatsak bawk a, chumai bakah missile leh drone tirhchhuah mai tur te pawh a tichhe tel a ni.
Houthis tena Red Sea a sumdawng lawng an beih avang hian shipping company te chu kal ngam lovin a kual zawngin Africa a Cape of good Hope ah an kal zel zawk a, chu chuan thil man ti to in hun a duh bawk a ni. US leh a thawhpui te chuan sumdawng lawng te chu vengin lawng kawng pawimawh Suez Canal atanga Bab el-Manded Strait thlengin an veng thin a ni. Heng lai hi lawng kawng lun lutuk niin hun pangngaiah chuan commercial vessel 400 vel zetin paltlang ziah ang a ni.
US chuan Jordan-a a sipai hmun beitu te chu islamic Resistance in Iraq, Iranian-back militias te an ni a ti a. Iran erawhin inhnamhnawihna a nei lo va, militia te chu an duhdan anga che mai zawk an ni a ti ve thung.
Iraq a Iranian-backed militia harakat al-Nujaba spokesperson Hussein al-Mosawi chuan US in a hmaa Iraq a beihna chu demin Washington hian chetlakna a neih apiangin nghawng chhe zawk a nei zel ang tih a manfiah tur a ni a ti a. Mahse, Baghdad a AP tena an interview-naah thung chuan, “Tun buaina hian helai region pum a nghawng kan duh lo” a ti thung a.
UK a inbun Syrian Observatory for Human Rights hotu Rami Abdurrahman chuan US airstrike avangin militia 23 in nunna an chan a ti a. Iraqi sorkar thupuangtu Bassim al-Awadi thung chuan mi 16 in nunna an chan a, nunna chan zingah civilian te pawh telin chenna in leh private property a tichhe nual a ti bawk. US chuan airstrike a kalpui hmain Iraq sorkar a hrilh hriat lawk thu a sawi thung.
US official te chuan damage assessment an neihah an target te an kahfuh thu sawiin mahse casualty an awm leh awm loh erawh an sawi lo thung.
Iraq sorkar chu Iranian-backed Iraqi militia Islamic Resistance in Iraq inti tena Iraq leh Syria-a Ocotber 18 atanga US base an beih tan hnuah dinhmun lai takah a awm a. He group te hian US base an beihna chhan chu Gaza indonaa Washington-in Israel a thlawp an duh loh vang tiin an sawi.
Iraqi official te chuan militia te chetlak dan chu an duhlovin an dem thu an sawi rualin US in a beihletnaah Iraqi sovereignty a namnul tia sawiin IS te bei tura Iraq a US sipai 2,500 la awm te pawh chhuak turin a ti bawk.