Centre min tiamna vangin ZMC kan enkawl zui dawn – Chief Minister

Sawrkar laipui hotute intiamna avangin centre kuta Zoram Medical College hlan a ngai dawn loa, state-in a enkawl zui dawn tih chief minister Lalduhoma chuan a sawi.
Inrinnia Kulikawn Hospital an tlawhnaah chief minister chuan, sawrkar laipui kuta ZMC pek an tih chhan chu state sum dinhmunin a zir loh vang a ni a; centre-ah pawh pe ila state quota a bo dawn loh tih a sawi. Chutihrualin Health minister-in centre hotute a dawr a, an ni chuan state-in a enkawl duh phawt chuan rawn dawmkan an lo tiam avangin centre kutah pek a ngai dawn ta lo tih a sawi a ni.
Kan airport neihchhun pawh tha se, changtlung se, chhuan tham nise an duh a, state sawrkar sum neihin a tlin ngang si loh avangin a enkawl theite hnena hlan chu an duhdan a nih phah ta tih Lalduhoma hian a sawi.
“Sum tam tak sengin Kamrula ten an thawk a, an hna a chhiain estimate lo ang hlirin an thawk a, tunah tak phei chuan hna an thawk hleithei tawh lo. Labour man ringawt pawh cheng vaibelchhe 5 vel ba an nei a, labour tur an hmu mang tawh lo. Pawisa an lo la deuh vek tawh si a, tih ngaihna a vang em em a ni,” a ti.
ZPM sawrkarah chuan quality tha lo an duh loa, CM office-ah a endiktu dah an ni tawh a, hna reng reng a tha tur a ni a, a hun takah an zo ngei bawk tur a ni tih chu an thuvawn a ni tawh tih chief minister hian a sawi a ni.