Ruihtheihthil donaa tha zawka ngaih vangin insawnkual mek

Danin a phut ang leh hmun ngaia awm reng chu ruihtheihthil dona kawnga thil tha ber a nih loh avangin department chhungah transfer and posting kalpui chhoh mek zel a ni tih Excise & Narcotics minister Lalnghinglova Hmar chuan a sawi.
Excise & Narcotics department hotute chu an minister Lalnghinglova Hmar kaihhruaiin Ningani khan Central YMA office-ah lengin chak leh awmze nei zawka ruihhlo do dan turah an inrawnkhawm.
Thawhhona tha a awm loh chuan ruihhlo leh a kaihhnawih chu awlsam taka do hneh theih a ni lo tih Lalnghinglova Hmar hian sawiin, tha ngah leh ban nei sei zawk YMA nena thawhho chu ngaihpawimawh hmasaka neih a ni tih a sawi. Ruihhlo do dan tha leh awmze nei zawk kalpui a nih theih nan infinchhuah tawn a tul tih a sawi a. YMA hruaitute chu Excise & Narcotics Department hmalaknaa duhkhawp lohna leh hmasawn ngaihna laite hrilhhre zel turin a sawm a ni.
CYMA president Lalhmachhuana chuan Kumpuan Sub-Committee ruahmannain chhunzan zawma duty a ni tih a sawi a. Ruihhlo leh a kawltu mante dan angin thuneitute hnena hlan thin an nih thu leh councelling pek bakah home thlenga dah an nih thu a sawi. Kumpuan Sub-Committee hminga thawk chhuakte inpekna vang liau liaua hma la an ni, tiin, department nena thawhho kawngah an inhawng reng a, rah tha zawk a chhuah ngei pawh a beisei tih a sawi a ni.
Thutkhawmah hian ruihhlo do kawnga hmalakho dan tur sawiho a ni a. Thawhhona tha tak neih mek chu chhawmnun zel nise tih a ni. Excise & Narcotics minister hian ruihhlo do kawnga CYMA tha tihchak nan Rs. 50000 a hlan a ni.