Budget Session tan dawn

Vawiin, February 19 atang hian Mizoram Legislative Assembly 9-na thutkhawm vawi 2-na tan a ni dawn.
A nikhatnaah hian larsap chuan House-ah thu a sawi anga, larsap a kal hnu ah a thusawia lawmthu sawina ‘motion’ chu House member Baryl Vanneihsangi’n a pulut anga, speaker-in House report awm leh panel of chairmen a puan hnu ah a tawp zui ang.
Tun Session-ah hian bill thar lut ‘The Mizoram Water Resources (Management and Regulation) Bill 2024’ a awm a. Dan dinglai siamthat tura chhawpchhuah thehluh zingah – The Mizoram Lokayukta (Amendment) Bill 2024, The Mizoram Goods and Services Tax (Amendment Bill) 2024 leh The Indian Stamp (Mizoram Amendment) Bill 2024 a tel a ni.
House chhunga chhan chi zawhna 432 a tling tawh a, ziaka chhan chi (unstarred question) 36 a lut tawh. Private member’s resolution 50 a lut tawh bawk.
February 27-ah finance changtu chief minister Lalduhoma’n an sawrkar hnua a vawikhatna atan sawrkar kum thar Mizoram sum hman tur a pharh dawn a. Session hi March 13 thleng awh tura duan a ni.