Pisa kai hun leh punctuality

General Administration Department ruahman angin sawrkar hnathawkte pisa kai hun siksawi a ni a, vawiin atangin office tan hun zing dar 9, ban hun tlai dar 5 tih a ni ta a.
Office kal hun leh ban hun tihdanglam a nih rual hian punctuality hi ngaih pawimawh a tul a, hei hi Mizoram sawrkar hnuaia department tin deuhthawah hian hmasawnna tur kan neih mek niin a lang.
Tuna office kai hun tihdanglam a nih hnu hian ni tin darkar 8 chhung hnathawh hun a awm dawn ta a. Hetia han ngaih mai chuan, hnathawh hun chhung a rei chuan hna pawh a thawh tam theih zawk dawn tihna a ni. Mahse, office hun chhunga office hna ni si lo, mimal thil avanga pawn lama chhuak apui hi an kat nuk thei zel bawk a. Office hour chhunga discipline hi kenkawh that a nih leh si loh chuan, tha taka punctuality maintain pawh ni se, office kai hun leh ban hun inkar darkar 8 zet hun kha tangkai taka hman a ni dawn chuang lo tihna a ni.
Tuna kan mamawh nia lang ta chu, office kai hun leh ban hun vawn dik (punctuality) bakah, office hour chhung hlawkthlak taka hmang thei tura discipline kawnkawh that, hi a ni.
A nihna takah chuan, office-a hnathawkte hian office hun chhung hi hnathawh nana an hman that phawt chuan, file pending awm rei rui ang hi chu awm ngai lo tura ngaih theih a ni. Office hna chinfel hi office-a thawkte hna pui ber a nih laia thildang dah pawimawh avanga hna pending tam em em thin hi ‘office kai hun leh punctuality’ aia pawimawh zawk a ni. Eng anga punctual tha pawh ni se, hna a ngaih pawimawh leh si loh chuan awmzia a awm dawn lo tihna a ni.
Punctuality a pawimawh rualin, office hour chhunga hnathawh dan system hi a pawimawh zawk chu niin a lang.