Tawngtai runpui neih tum laiin Assam Rifles ho nen inbakkaih

Tawngtai runpui neih tum laiin
Assam Rifles ho nen inbakkaih
Thawhlehnia Aizawl Sipai Lammuala sual thupha chawi chawnghei tawngtai beihpui neih dawn laiin, Assam Rifles lamin harsatna an siam avangin hun engemawti chhung tih khaihlak a ni.
The Aizawl Post hriat danin, state sawrkar hriatpuiin Organising Committee indinin State Day puala sual ngaihdam dilna tawngtai nei tur hian dan ang thlapin Lammual hman phalna hi Assam Rifles hnenah dil a ni a, phalsak an ni. Programme pui ber hi chawhnu dar 1.00 ah chief minister hoa hman tur niin, tluang taka hun an hman chhoh mek lai, chawhma dar 11.30 velah Assam Rifles hian thawm a ring lutuk tiin, tizawi turin an ti a. A tul ang hrilhfiah an nih hnu ah pawh, ngawihsan mai loin Lammual gatepui kharah an vau a, an khar zui hman nghe nghe tih sawi a ni.
Organising Committee aiawhten AR hotute hmu nghalin thil awmdan an sawipui leh a, thu a inhmuh theih mai loh avangin programme kaltluang tur tihthuanawp tumna hi tha ti loin gatepui kharna chhut chhiat mai tul ti an awm a, chhutchhiat em ngai loin gate hi hawn a ni a. Chhutchhiat tuma hma latu zing ami chu AR lam hian a tel ve zel remti loin buaina an siam zui leh tih sawi a ni bawk. Chhuahsan bik em ngai loin Mizoram Police hotute leh AR hotute inbiak hnu ah programme pawh tluang takin a kal zui ta tih sawi a ni.
State Day of Prayer huaihawttute chuan missionary-te zarah Kristian ram tiin Mizoram kan inchhal a. 1987 February 20 atangin state puitlinga hlankai kan nih hriatrengnan kumtin State Day kan hmang thin a, official function bak engahmah Kristian kan nihna lantir zawnga tih a la awm ngai loh avangin, ram pum huapa Pathian hnena tawngtai ni hmang ve tawh turin mi thahnemngai intelkhawmten chief minister Pu Lalduhoma an sawipuina atangin he thil hi huaihawt chhoh a ni ta tih an sawi a ni.