ASF leng lakah inkhuahkhirh

Khawzawl district magistrate K Lalrohlua chuan Section 133 CrPC 1973-in thuneihna a pek angin, vawk hrileng mek African Swine Fever (ASF) laka an district a fihlim theih nan khuahkhirhna thupek a tichhuak.
Tunhnaiah Champhai district huamchhungah ASF a leng mek nia hriat a nih avangin, he hri laka an district a him theihnan – India ram pawn atangin leh Mizoram district dang atangin vawk, vawksa leh vawksa atanga thil siam reng reng lakluh leh thawnchhuah khap tlat a ni tih a sawi.
Tualchhunga vawk talh tur chuan vawk hrisel tha ngei a ni tih finfiahna, a thuneitu bik atangin an nei ngei tur a ni, tiin, vawk damlo nei chuan AH & Vety damdawi in emaw VC emaw hriattir turin a ti.
Dam lohna avanga vawk thi chu thuk taka phum turin a ti a. Vawk neitute chu vawk dam lo talh/ hralh lo turin a ti bawk.
He thupek zawm lo chu IPC Section 188 hmang hrem theih an ni tih a sawi a. Khapna thupek hian thupek dang tih chhuah a awm a nih loh chuan, chhuah a nih atanga thla hnih chhung a huam dawn a ni.