Mizo thalaite tan kawng dap

Mizoram Youth Commission chairman Malsawmzuala Ralte leh OSD to chief minister Jonathan Lalremruata te chuan Nilaini khan sawrkar laipuia minister of state for Skill Development Rajeev Chandrasekhar chu a chenna in Delhi-ah kawmin MYC-in Mizo thalaite tana skill development training a buatsaih theihnan hma lakpui turin an ngen.
Union MoS chuan thalai a tam thei ang ber skill training pek a duh thu lo hrilhin, MYC atangin lehkha siam a, a hnena thehlut turin a ti a. Lehkha a hmuh atanga darkar 48 chhungin a team ten Aizawl an thlen nghal tur thu sawiin, an ni nena sawi ho hnuah final mai tur a nih thu a sawi bawk.
MYC chairman leh OSD to CM hi Taipei Economic and Cultural Centre-ah lengin Education Division director Peter LY Chen an kawm a. Taiwan-a Mizo thalaite tana hnathawh theih dan awmte sawihoin, a remchan anga hma lak ho nise, an ti.