Vellore-a heroin thawn tumtu man

Vellore-a thil thawn tum zinga heroin awm thu social media-a darh chungchangah February 19-a Vellore pan tur C Laldinsanga, Chhinga Veng chuan Vellore-a awm mekte thil chah an thawn a ken thlak sak tur chu a rinhlelh avanga a endik thu leh chu thil chu heroin a lo ni reng tih a hriat rualin February 18 zan khan Excise & Narcotics hriattirin a man tir duh thu a thlen a.
Excise & Narcotics Department hian bawhzui nghalin, heroin thawn tumtu phone number atangin social media (facebook leh instagram) lama a account zawn chhuah a ni a. Lalrohlua (30), Durtlang Leitan Ramthar a ni tih hriatchhuah niin, amah hi February 21 zan khan man a ni.
CMC Vellore Mizo Assocition leh Vellore Mizo Welfare chuan thuchhuah intawm siamin, he thil thleng hi chuan pawi an ti hle a. Dam lohna avanga Vellore kala hnamdang kara inenkawlten hun lokal zel turah hnamdangin hetiang zawnga min hmelhriat tur hi an ngaingam loa, hetiang hi thleng nawn tawh lo se an duh hle tih an sawi.
Dam lohna avanga Vellore kal thin leh la kal zel turte pawhin mi thil thawn kan ken hmain eng thil nge kan kensak dawn tih finfiah hmasa thin turin an chah tih an sawi bawk.
‘Tunhnaiah Vellore tualchhung mite atangin Mizote zingah zu in thin, midang tana hnawksak an awm thu complain dawn a ni a, Vellore-a kal thinte leh la kal zel turte pawh Mizo hming tichhe zawnga khawsa lo turin kan inngen a ni,’ thuchhuah hian a ti.