Mizoram Assembly House-ah India vice president-in thu sawi

Langa Mizoram tlawhtu vice president of India Jagdeep Dhankhar chuan Thawhtannia khan Mizoram University Convocation a hmanpui zawh hnu ah 9th Mizoram Legislative Assembly thutkhawm neih mek chu telpuiin member-te hmaah thu a sawi.
Vice president chuan MLA zawng zawng deuhthaw House-a an thu chu fakawm a tih thu sawiin, state dang legislature leh Parliament-ah pawh Mizoramin attendance tha tak an nei chu a sawizui zel tur a ni tih a sawi a. Mizorama Assembly Session kalpui tawh dan a lo en thu leh, felfai leh zahawm taka an thurel dan chu lawmawm a tih thu sawiin, MLA-te chu sawrkar hnathawk kaihruai turin entawntlaka an awm zui zel a beisei tih a sawi a ni.
MLA-ah hmeichhia pathum Mizoramin a nei chu ram hmasawnna in a kentel nia a hriat thu a sawi a. India sawrkarin inrelbawlnaah hmeichhiate tan zau zawka kawng hawng tura hma a lak chuan rah tha zawk a chhuah ngei a ring tih a sawi a ni.
India ramin nasa taka hma a sawn thu sawiin, he hmasawnna atan hian hmarchhak state, Mizoram telin an pawimawh hle tih Jagdeep Dhankhar hian a sawi a. Sawrkar laipui pawhin hmarchhak state-te hmasawnna chu ngaipawimawhin, a enkawltu tur department hran siam a nih thu te, tunhnai kum 10 chhunga hmasawnna ruhrel pawimawh North Eastern Council leh sum hnar dang kaltlanga din a nih thu te a sawi. Sawrkarin thalaite hmakhua ngaiin ruahmanna a siam a, hma a lak avangin tun hun anga thalaiten an tuina leh an chak zawng bawhzuia an hlawhtlin theihna ang hun tha a la awmlo tih a sawi bawk.
Mizoramah tourism, horticulture leh kawng dang danga sum dehchhuaha nasa zawka hma sawn tura theihna awm chu vanneihthlak a tih thu a sawi a. House member-te chu heng theihna hi a tangkai thei ang bera hman a nihna turin mi pawimawh ber an ni tih a sawi a ni.
Chief minister Lalduhoma chuan vice president-in Mizoram a tlawh chu lawmawm a tih thu a sawi a. State hmasawnna atana theihtawp chhuah a nih tur sawiin, sawrkar laipui tawiawmnaah thui tak a innghat dawn tih a sawi a ni.