MLA-in PUC-ah hun hmanpui

Pachhunga University College-in Thawhtannia Yuva Samvad India @2047 programme an hman chu MLA Jeje Lalpekhlua’n a hmanpui.
He programme hi sawrkar laipui Ministry of Youth Affairs and Sports-in state tina National Service Scheme (NSS) hnuaia unit hrang hrangte hmang tura a tih anga hman a ni a. Thalaiten ram leh hnam hmangaihna an neih thar theih nan leh zalenna hlut zia an hriatthiam thar theihnana buatsaih a ni.
MLA chuan Mizoramin hma a sawn theih nana sawrkar hmalakna tur policy hrang hrang sawiin, Hand Holding policy chungchang leh zirlaite tana policy awm thei a sawi a. Hnamdangte nena inkawmnel pawimawhna, inzah tawn leh inhmangaih tawn pawimawhna, Mizo nun zemawi tlawmngaihna, huaisenna, thawhrimna leh aia upa zah thiam chhawmnun zel a pawimawh thu te a sawi.
Resource person Prof Malsawmliana chuan zirlaite chu theihtawpa ram leh hnam tana ke pen tur leh, lehkha an zirna kawngah ram leh hnam hmangaihna rilru pu chunga zir a, ram leh hnam thatnan ngaihtuahna seng turin a chah. Mizo hnam hi kan changkan san thiang loa, lehkha kan thiamsan thiang lo bawk tiin a sawi.
NSS PUC Unit volunteer, Lalrinzuala leh Lalrempuii ten “Yuva Samvad” tih leh “Goal of developed India” tih thupui hmangin thu an sawi bawk.