Home minister-in hna a tlin lo – MPCC

Champhai District Jail-a tang zingah zana lengchhuaka haw leh thin an awm thu sawitu Home minister chuan a hna a tlin loh zia a tilang tih Congress party chuan sawiin, vanduaina thleng palh se mawhphurhna a la ngam dawn lo tih a chian thu an sawi.
MPCC thuchhuak chuan, February 26-a Budget Session-ah Home minister Pu K Sapdanga’n Champhai Jail chhiat dan a sawinaah, a bang atan rangva tun hmangin, jail tangte zana nula rima an chhuah thin thu leh zan reia jail-a an hawn leh mai thin thu a sawi chu an ngai thutak hle a. Dan leh thupek kengkawh ber tura ngaih Home minister-in jail tang mek, lengchhuak thinte thil tih dan pawmpui ang zawnga tawngkam a nei chu rorelna laltiang lek tura quality a neih loh zia a tarlangah an ngai tih a sawi.
‘Dan bawhchhiat avanga jail tangten zana zalen taka nula an rim tih hrereng chunga hetiang tawngkam chhakchhuaktu Home minister hian a hna a tlin loh zia leh a hlen loh zia a tarlang chiang a. Jail tang mekte mipui zinga zalen taka an leng thei hi mipui tan a him lo a ni tih hre chunga haidertu Pu K Sapdanga hian vanduaina thleng palh ta se, mawhphurhna a la ngam dawn lo tih a chiang,’ a ti.
Sawrkar kal tawhte thiam taka sawisel thin politician-te chu ram rorelna fawng chelh tura an that ber loh zia ZPM sawrkar hotute thusawi leh thiltihah a rawn lang zel tih MPCC hian sawiin, ‘Enchhin sawrkar kan hrawn mek hi Mizoramin sawrkar kan neih tawh zinga laktlak lo ber leh rintlak loh ber a ni tih a langchiang zel a. Mizoramin hetiang hun kan hmachhawn mekah hian Congress party chuan mipui tan he enchhin sawrkar hi a lipse zel dawn a ni,’ a ti.