Kum 30 hnuah Rabung kawng siamtha tum dawn

Khawzawl – Rabung kawng, km. 33-a thui siamthat dan tur relin Thawhtanni khan Khawzawl bawrhsap K Lalrohlua hoin Khawzawl PWD Division leh Rabung Village Council an thukhawm.
Rabung kawng hi kum 1987 vela laih niin, 1994 vela black topping tih a ni a; hemi hnu hian mumal taka siamthat a ni zui ta lo a ni. Rabung VC chuan kawng hi tum hnih khat kawng chhe zual lai (pot holes etc) hnawh zeuh zeuh a awm tih loh chu kum 30 vel enkawl mumal loh niin an sawi. PWD lam chuan a theihna ang angah a siamna tur sum an zawn thu an sawi a. NABARD-ah pawh project siama an thehluh thu leh a tlang loh thu an sawi a ni.
Bawrhsap chuan NABARD hotute a lo sawipui tur sawiin, PWD chu project siamthaa inruahman turin a chah. He kawng siamthatna atan hian a theihna apianga hma lak a tum thu a sawi a ni.
Khawzawl PWD Division hian Tualpui- Rabung Road (km.16.25) siamthat nan North Eastern Council hnuaia North East Special Infrastructure Schemes (NESIDS) atangin cheng vaibelchhe 78 ruahman a ni tih an sawi a. Hetihlai hian Rabung VC chuan Khawzawl to Rabung via Tualpui siamna tur sum ruahman a awm mek chungin, a main road zawk Khawzawl to Rabung via Khualen hi siam nise an duh tih an sawi a ni.