RRF notification dinhmun a chiang lo

Sawrkarin ram leh ramngaw a humhalhna atana pawimawh Riverine Reserve Forest Notification 1965 chu dinhmun chiang lo takah a awm mek tih sawi a ni.Environment humhalh kawnga hma latu pawl ho intelkhawm – Mizoram Environmental NGO Coordination Committee (MENCO) chuan dan hmanga ramngaw humhalh bikna – reserved forest hi central leh state sawrkarin thuneihna insemna (concurrent list) niin, reserved forest-a puan tawh thiat leh tur chuan state sawrkarin rawtna a siam chu sawrkar laipui emaw Supreme Court emaw in rem an tihpui hnu ah chauh thiah theih a ni tih an sawi a. Mizoramah Riverine Reserve Forest (RRF) Notification hnuaiah hian lui 16 bakah Aizawl leh Silchar (via Sairang) motor kawngpui kam sir tawn ve ve, ramhnuai mel chanve chin chu ‘reserved forest’ a huam tih an sawi.
He notification-in ‘reserved forest’ a a puan hi ramhnuai chin chauh niin, mihring chenna (settlement) hmun khat mah puan tel a ni lo tih an sawi bawk.
Kum 1998-a Tuirial Hydro Electric Power Project thawh dawnah, mi duham thenkhat ten zangnadawmna dilna atan RRF chhungah hian ram pass siamin, he project pawh hi tawpsan a nih phah a. Kum 2008-a state roreltu inthlakah reserve rama zangnadawmna dil dan dik lo haichhuah a nih hnu ah an pass hi cancel a ni a. 2018-a sawrkar inthlakah zangnadawmna dil hi thar thawh lehin High Court-ah an kal a, High Court single bench hmaah Mizoram sawrkarin dan anga heng ram huamchhunga RRF Notification puan a nihna hi a phawrh thei ta loa, court hian notification hi paihin, compensation diltute hnenah pe turin thu a titlu nghal bawk tih an sawi a ni.
Reserve forest valh tawh, an remtih puina loa paih emaw sahthlak emaw theih a nih loh thu Supreme Court-in a tihchhuah bakah High Court single bench-in RRF Notification dinchan tir zawkna thubuai a lo rel fel tawh nen tanchhanin, High Court principal bench chuan RRF Notification hi sawibuai tur awm loah a ngai tih chu a thutlukna a ni a, an ni emaw Supreme Court ah emaw appeal chu Mizoram sawrkar tih makmawh a nih laiin, bawhzuina a awm lo tih an sawi a ni.
RRF huamchhunga pass neite hian a ram hi neih tuma an la beih reng avang leh, zangnadawmna hmuh tuma an la beih reng bawk avangin RRF notification tun din leh thuai chu thil tul leh hmanhmawh thlak a ni tih MENCO hian an sawi a. Mizoram (Protection of Rivers) Act 2023 hmanga he notification thlak avanga hmasawnna hnathawh awlsam phah tur anga sawi chu thu dik lo a ni tih an sawi.