Ramri hung tum leh FMR tih tawp duh lohnaah inlungrual

India sawrkarin Burma nena inkalpawh theih chin siam – Free Movement Regime (FMR) a tihtawp leh ram inrina hung a tum duh lohna resolution chu Mizoram Legislative Assembly-ah sawrkar laiin a pulut a, a tam zawk inlungrualin an pawm.
Home minister K Sapdanga chuan sawrkar official resolution – “Sawrkar laipuiin Free Movement Regime tihtawp a tum leh Myanmar nena kan inrina, ramri hung a tum hi tha kan ti loa, ti lo turin kan ngen a ni. Dik lo taka British sawrkarin ‘divide and rule’ policy hmanga Zofate min thendarh hi rorelna pakhat hnuaia kan kun leh theihna turin hma min lakpui zawk rawh se,” tih a pulut a. Zofate chu tuna India, Bangladesh leh Myanmar ni ta ah, tunhma atangin mahnia ro inrela kan khawsak laiin, British sawrkarin heng hmun a awp hnu ah awp beh kan awlsam nan thendarh kan ni ta tih a sawi.
British hotu zingah rorelna pakhat hnuaia kan awm min duhsaktu an awm ve tho avangin 1892 January 29 khan Kolkata ah Chin-Lushai Conference koh a ni a, Zofate ram khat leh rorelna pakhat hnuaia kan awmna turin thutlukna siam ni mah se, tih puitlin a ni ta loa, tun thlengin thendarhin kan awm phah ta tih a sawi bawk.
FMR hnuaiah duh duha inkalpawh tawn ngawt theih ni loin, ramri bulah sawrkar hminga phalna siamsaktu ruat a ni a, passport ngai loin ramri kan duhte chuan phalna an lak a ngai a, zan riah erawh phal a ni lo tih Home minister hian sawiin, sawrkar laipui chuan FMR hi ngaimawh ta riau a, FMR tihtawp hi Manipur sawrkar rawtna a pawm vang mai a nih a rin thu a sawi a ni.
FMR tihtawp leh ramri hung chungchanga India sawrkar chhuanlam – ruihhlo tawlhruk, dan phal loh bungrua tawlhruk, hel leh dan loa ramri kan thinte zalen taka an chetvel theih, tih te chu anmahni, India sawrkar thiam loh leh an chak lohna, an mawhphurhna vek a ni zawk tih a sawi a ni. FMR chu India thenawm ram danga kalpui ala nih reng bakah ramri hung pawh China leh ramri a neihpui ramdangah kalpui a nih loh laia, kalpuina bik neih chu, a khua leh tui zingah tih hrehawm duh bik a nei nia ngaih theih a ni tih a sawi bawk
Resolution hi eptu lama thu MNF member-te chuan an pawmpui a, BJP member lamin a duh lo zawngin sawi lo mah se, ruihhlo leh dan loa thil tawlh thin tihrehna atana tul ti tawk awmte awm ngaihtuah tel chunga uluk taka ngaihtuah that ngai a ni, tiin, centre hmalak dan hriat hmaa lo buaipui vak chu tul ber loah an ngaih thu an sawi a ni.