Kan chin than thin tana \ha si lo
Kan chin than thin tana tha si lo
Chesawn lo va thut rei lutuk hi thau-na, diabetes risk tisangtu leh anxiety te pawh thlen thei tih chu kan sawi fo tawh, mahse, thut nasat lutukin thin (liver) a nghawng theih dan erawh kan la hre tam lo viau maithei.
Awm âwl leh thut nasat lutuk hi non-alcoholic fatty liver siamtu pakhat niin South Korea-a mithiam ten zirchianna an neih atangin an hmuchhuak niin an sawi a, he zirchianna chungchang hi Journal of Hepatology-ah tarlan a ni a, zirchianna an neih atanga an hmuh danin nikhata darkar 10 emaw a aia rei emaw thu thin te chuan thin (liver) natna chi hrang hrang neih theihna risk 9%-in a thu rei lo zawk te aiin an nei sang zawk niin an sawi.
Chuvangin rei tak tak che sawn lo va thu mai lovin chet sawn deuh reng a tha niin an sawi a, nikhata pen 10,000 tal kal thin te chuan exercise la tha ve lo te aiin NAFLD neih theihna risk an nei hniam zawk niin an sawi.
South Korean mipa leh hmeichhia 1,40,000, an kum chawhruala kum 40 zingah zirchianna hi neih a ni a, questionaire chhan tirin nikhata an thut rei dan chhut chhuah sak an ni a, chung zinga 35% (40,000 vel) chuan ultrasound test atangin NAFLD an nei tih hriatchhuah a ni a, heng NAFLD nei te hi nikhata darkar 10 leh a aia rei thu thin te an ni.
Zirchiannaa an hotu Dr. Deungho Ryu chuan zirchianna a an hmante chu taksa lama insawiselna nei lem lo an nih thu a sawi bawk.
Newcastle University, England-a professor of metabolism Michael Trenell chuan, “Kan taksa hi che tura duan a ni a, chuvangin awm âwl hian kan physiology-ah nghawng a nei hi a mak lo,” a ti.
Trenell chuan kan nitin khawsak phung thlak danglam, exercise lak that a, taksa chet tir tam chu damdawi tha tak niin a sawi a, kar khatah minute 150 exercise pangngai taka lak emaw, nitin pen 10,000 tal ke a kal te chu taksa hrisel nan a pawimawh niin a sawi.
Trenell chuan eng chen nge thu nasa lutuk chin chu bithliahna fel fak a la awm lo niin a sawi a, mahse, he zirchianna atang hian thut tam aiin thut tlem a tha zawk tih a chiang niin a sawi bawk.