Ri hriatna tha lo ngaihven zui rang turin mipui chah

Benga ri hriatna tha lo thei laka inven a that rualin, hetiang lama harsatna neih leh neih loh inchik ngun a, enkawl ran a tul tih heng enkawlna lama mithiamte chuan an sawi.
March 3 kha World Hearing Day a ni a, he ni denchhen hian Thawhtanni khan Aizawl Press Club ah National Programme for Prevention and Control of Deafness (NPPCD) National Health Mission: Mizoram huaihawtin Mizoram Journalists’ Association member-te nen hun hman a ni. ENT specialist Dr Lalramnghaki chuan kumin thupuiah “Changing mind-sets : let’s make ear and hearing care a reality for all” tih hman a ni a; bengngawngte dinhmun hriatthiampui mai niloin, kan beng leh ri hriatna kan enkawl danah ngaihdan thlak a tulna lam inzirtir a tul tih a sawi.
Ri hriatna tha lo chu pianpui leh kum upat lama nerve chak loh vang a nih theih rualin, chemical exposure leh trauma vangte, music ngaihthlak rin lutuk leh kan eizawnna leh khawsakna chhehvel bengchheng ta lutuk vangte pawhin a awm thei tih a sawi a ni.
Hun hmanpuitu Persons with Disabilities commissioner Vanlaldiki Sailo chuan, bengngawnna chu en maia rualban lohna lang lo a nih vangin hrethiamtu an mamawh a, an tan khawvel hi a reh tlawk tlawh tih a sawi. Sign language interpreter chu India sawrkarin a ngaipawimawh a, thil tih khawm, programme pawimawhah chuan telh ve zel tawh tura a tih a ni tiin, “A hmunah khan bengngawng an awm kher lo a ni maithei, kha programme kha TV-ah an lo en ve a nih pawhin an hriatthiam ve hi sawrkarin a dah pawimawh a ni,” a ti.
Vantlang building, zirna in leh biak in thlengin ‘disable friendly’ a ni tur a ni, tih chu sawrkar laipui thuchhuak a nih bakah Rights of PwD Act-in a phut a ni tih a sawi a. An enkualnaah biak ina wheelchair luh theih lohna leh PwD tana hman tur inthiarna bik siam lohna a la tam bakah college-ah pawh hetiang hi a la tam thu a sawi. “Fiamthu thawh nan leh nuihzata rualbanlote rual ban lohna hman hi danin a phal lo. Complaint a awm a nih chuan dan hmangin hma kan la dawn. Rualban lohna hi tu chungah pawh thleng thei, chhungtin ta ni thei a ni tih hrereng ang u,” PwD commissioner hian a ti.