MNF OB-te tlingah puang

MNF office bearers tura official candidate ho chuan chuhpuitu an neih loh avangin tlinga puan an ni.
Kum 2024 – 2027 chu MNF Gen. Hqrs. hruaitu (elected OB) atan tlinga puante chu: president – Zoramthanga, senior vice president – Dr R Lalthangliana, vice president – Vanlalzawma, vice president – Lalchhamdama Ralte, treasurer – Lalruatkima an ni.
Thawhtanni khan MNF office, Mizo Hnam Runah OB tharte hi tlinga puan an ni a, certificate hlan nghal an ni. Hemi rual hian Mizo National Day vawi 58-na hman niin, MNF president Zoramthanga chuan Mizo hnamin zalenna nei tura kan beih tanna ni kan thleng leh ta chu lawmawm a tih thu a sawi a. “Pu Laldenga leh khatih lai MNF hruaitute khan buai pumbelh hram an tum a. Mah se, Assam CM PB Chaliha chuan inbiak a duh tawh loa, sipai a rawn tirh luh tak avangin silai a puak ta a ni,” a ti. Silai puah chhana mawhphurtu chu India sawrkar a nih thu a sawi.
MNF chuan hniam lai nei mah se, Pathian hruainain a tho kang leh thin tih a sawi a. Mizo Union leh PC party an ral tawh a, Congress pawh an hniam tawh hle, tiin, “MNF erawh kum 60 chuang Pathianin hun harsa leh khirh tak karah pawh min hruai zel a ni,” a ti. ZPM pawh hnatlang party an ni a, belkeh phuarkhawm ang mai an ni a, an kehdarh chu a nasa viau dawn tiin Zoramthanga hian a sawi.