MZP-in asst professor lak dan siamthat a duh

College-a thawk tur assistant professor lakna kalpui thin danah duhsak zawngte thun theihna a inhawng nia hria in, siamthat an duh tih Mizo Zirlai Pawl chuan an sawi.
MZP Gen. Hqrs. thuchhuak chuan Mizoram college hrang hranga thawk tur assistant professor lakna kalpui thin dan chu duhsak zawng thun theihna remchang kawng zau tak hawnna nia a hriat avangin a kalphung (system) hrim hrim siamthat nise a duh tih sawiin, ngun taka ngaihtuahna seng a, ennawn tur leh a thiam apiang an luh theihna turin thuneitute a ngen tih a sawi a ni.
Hetihlai hian HSLC exam hmachhawn zirlai pakhat, hmaituam tu tih hriat lohin chemte-in a pumah a vit tih an hriatin pawi a ti takzet a, an tawrhpui zia lantirnan he zirlai hi an kan tih MZP hian sawiin, ‘Hetiang thil duhawm lo hi thleng nawn tawh lo se kan duh a. Zirlai chunga pawikhawihtu hi a rang thei ang bera man chhuak a, a phu tawk hremna pe turin thuneitute kan ngen a ni,’ a ti.