Zirtirtu pakhat enkawl sikulah pek belh dawn

Sawrkar school zingah zirtirtu pakhat chauhin a enkawl chu kum khat chhunga pek belh vek an tum tih School Education minister Dr Vanlalthlana chuan a sawi.
Assembly Session-a member-te zawhna chhangin minister chuan, zirtirtu leh zirlai awm zat inmil lo lutuk, zirlai tlemte awmnaa zirtirtu awm teuh ang chite chu siamrem tum a ni a, hemi atan hian transfer & posting rules siam mek niin, rules neih ngawt niloin, a tak taka hman tum a ni tih a sawi.
“Rules-ah hian, hmun nuam deuh, hmun harsa deuh, A B C D-a dah a ni a, rules nei sa mah ila, tih danglam deuh tum a ni,” a ti.
Sawrkar hmasa in inthlan dawn hnaiha school upgradation a kalpui chu, notification cancel a ni loa, tun budget tharah pawh upgradation atan hian sum dah a ni zawk tih Dr Vanlalthlana hian a sawi. Chutihrualin, provincialise leh lumpsum-a dah tumte chu endik that leh an duh a, school building an nei tak tak em, tih enfel leh phawt an tum a, a dik leh felfai tak tak chin chu kaltlangpui mai pawh beisei a ni tih a sawi a ni.
Mizoram Education Reforms Committee aN din a, an ni hian an ngaihtuah tur hrang hrang zingah school timing leh school uniform inang hmante thlengin an ngaituah dawn tih a sawi a ni.