Zir dan tur pangngai loa nursing zir an awm – MNC

Nursing zir zingah inkaihhruaina in a phut ang ni lo, dan dik loa zir an awm tih Mizoram Nursing Council chuan an sawi a. Hetianga zir hi dan hnuaia ziahluh theih an ni dawn lo tih an sawi.
Mizoram Nursing Council (MNC) thuchhuak chuan, Mizo thalai, state danga nursing zir, a bikin Post Basic B.Sc Nursing leh M.Sc Nursing course zir zingah, regular loa district education (correspondence/ non attending mode) a zir lui an awm tih an hriat thu sawiin, hei hi Indian Nursing College (INC) guidelines kalh tlat a nih avangin MNC chuan a ngaimawh hle a. State dang atanga nursing course zir chhuak, MNC-a in register tur emaw additional qualification certificate dilte pawh fimkhur takin screening neih thin a ni a; regular loa zirte hi danin a phal loh avangin MNC hnuaiah in register theih a ni lo tih a sawi.
India ram chhungah nursing zirna hi INC hnuaia awm niin, syllabus leh regulation uluk taka duan a ni a. Hei hi India rama nursing institution zawng zawng zawm vek tura tih an ni tih a sawi a. INC hnuaia nursing zirnaah hian regular/ formal (theory & practical) a zir vek tur niin, Post Basic B.Sc. Nursing course bik chu INC pawmpui IGNOU Stundy Centre hnuaia a zir theih a ni tih a sawi bawk.