Loneitu ten Delhi panin kawngzawh

India loneitu tena lungawilohna an lantir kum hnih hnuah an thlai thar te leina bithliah fel tak guaranteed price ngiatin lungawilohna an lantir leh ta a.
Loneitu sang tam tak te chuan Delhi pana kawngzawhna neiin mahse sorkar laipui chuan India capital an luh remti lovin kawngpuiah loneitute dan nan theihtawp chhuahin a tang ve thung a. Thuneitute chuan barricade te siamin razor wire te an kham bawk a, concrete block te dahin engti kawng pawhin loneitu kawngzawh te chu dan an tum thung.
Loneitute hian kum 2020 khan sorkar in sawisel hlawh agricultural reforms a kalpui duh lovin lungawilohna an lantir hmasa ber a. Loneitu sang tam tak te chu khawlum, khawvawt leh Covid pawh pawisa lovin Delhi ramri bulah an inkulh a ni.
Loneitute lungawilohna chu Prime Minister Narendra Modi kaihhruai NDA sorkar tana chona lian ber tia sawi a ni hial a.
Kum 2021 khan sorkar chu tlawm zawkah tangin agricultural reforms law a siam te chu a hnukkir a, loneitute thil ngiat guaranteed price te ngaihtuah tiam leh loneitute laka criminal case siam te hnukkir a tiam avangin loneitute chuan an lungawilohna an titawp a ni.
Mahse, tunah loneitute chuan sorkar chuan a thutiam a hlen lo tiin lungawilohna an kalpui leh ta a ni.

Kum 2020 lungawilohna kha?
Loneitute duhloh ber chu farm law pathum BJP kaihhruai NDA sorkar siam chu niin chu dan pathum hmang chuan thlai thar hralh, a man bithliah leh dahthat zalen zawka siam tumna niin kum tam tak loneitute humhimna chu a thiat a ni ber.
Farm unions te chuan chung dan pathum te chuan company lian te lakah loneitute chu him lo lutukah a siama an intun nunna te a tichhe vek dawn an ti a ni.
BJP sorkar chuan dan thar pathum te chu loneitute tana tha zawk tur a ni tia an camapign char char chungin a tawpah Narendra Modi chuan a sorkar chuan farm law pathum te chu a hnukkir e tiin 19 November 2021 khan a puang ta a ni.
Loneitute tan chakna anga ngaih a ni a, chutihrual chiah chuan nasa taka mipui tam takin lungawilohna an lantir chuan sorkar pawh tlawm lo thei lovin a siam tih lantirna a ni bawk.
Loneitute chuan an lungawilohna lantirna hmun te chu PM Modi an farm law a hnukkir thu a puan hnuah pawh an chhuahsan mai duh lo va, an demand tam tak te an pawmna formal letter an phut phawt a ni. Sorkar chuan lungawilohna lantirnaa nunna chan te zangnadawmna pek thlengin a pawm ta a.
Minimum support price chungchangah chuan sorkar chuan committee dinin chutah chuan federal leh state sorkar aiawh, agriculture scientists leh farmer group aiawh te an tel ang tiin a tiam bawk a ni.

Tunah eng vangin nge loneitu ten lungawilohna an lantir?
Loneitute chuan sorkar chuan kum 2020-21 protest an neiha an thutiam a neih te chu a tihlawhtling lo an ti. Chumai bakah pension ngiat bawkin sorkar chu an leiba te ngaidam turin a ngiat bawk.
Loneitute chuan fake seeds, pesticides leh fertilisers te hralh tute chu hrem turin an ngiat bawk a. Sorkar chu rural employment guarantee scheme a hnathawh ni chu a let hnih ni 200 a tipung turin an ngiat bawk.
Loneitute chuan India chu World Trade Organisation(WTO) atanga inhnukdawka free trade agreements tin te hnawl vek turin an ngiat bawk.

Eng vanga loneitu lungawilo te chu pawimawh nge an nih?
India ramah chuan loneitute chu voting bloc pawimawh ber leh thiltithei ber na ni a, chuvang chuan sorkar chuan anmahni kalh zawngin a che ngam lo va, kuminah phei chuan inthlanpui hmachhawn mai a ni dawn bawk si a ni.
February thlaa loneitu tena lungawilohna an lantir tan leh khan sorkar chuan Punjab, Haryana leh Uttar Pradesh atanga Delhi an pan tur dan tumin theihtawp a chhuah tawh a. Inbiakna pawh neihpuiin tum thum zet an inbiakna chuan rahtha a chhuah thei lo.
Nilaini khan farmers union pahjnih te chuan ram puma loneitute chu public transport hmag tala Delhi pan turin an ngen a.
Hei mai bakah hian March 10 ah rel dan chahna ‘rail roko’ neih tur an ti bawk.