ZMC-a MBBS zirlaite kum 2 tal sawrkarin a chhawr dawn

Zoram Medical College-a doctor zirchhuakte chu state sawrkarin kum hnih tal a chhawr zui theih turin a intiam tir a, kumin April-a zirchhuak turte zir zawh hunah medical officer indaih loh a ziaawm theih beisei a ni tih Health minister Lalrinpuii chuan a sawi.Assembly Session-a zawhna chhangin Health & Family Welfare minister chuan specialist doctor post 7 hnawh khat turin Mizoram Public Service Commission-ah recruitment kalpui mek a ni a, tunhnai khan Ayush doctor 5 an la thar a, offer of appointment an pe mek. Medical officer post 9 hnawhkhat turin MPSC-ah an thawn tawh a, recruitment kalpui theih thuai beisei a ni tih a sawi. Specialist post 3, MO post pakhat leh dental surgeon post pakhat hnawhkhat turin DP&AR-ah phalna an dil mek tih a sawi bawk.
Hmun hrang hranga doctor indaih lohna chu kumin April-a ZMC-a zirchhuak turte an zir zawh hunah an indaih a beisei tih a sawi a. Medical officer turin doctor-ten a nghet loa thingtlanga awm an duh lo a, ZMC zirlaite chu an zir hma in sawrkara intiamkamna an ziah angin kum hnih tal state sawrkar hnuaiah an thawh a ngai dawn a, an hlawh a tlem emaw tlem lo emaw, thingtlang hmun hrang hrangah an dah theih dawn tih a sawi a ni.
Doctor dang awm si hnimhlum doctor awm lohna damdawi inah hnimhlum pe thiam dah tur an awm lo tih Lalrinpuii hian a sawi a. MLA-ten an sum senga thawktu an ruai chu lawmawm a tih thu sawiin, chhawk zangkhai an chakawm tawh rualin sawrkar sum harsatna avangin an la ti thei lo tih a sawi. Post ruak hnawhkhat turin hma an la a, DP&AR leh Finance department-in an dilna an remtih chuan post ruak tam lutuk avanga harsatna sutkian a ni dawn tih a sawi bawk.
S Vanlaiphai damdawi in (PHC), khum 10 awm thin, sakthat mek chu kumin February khan a tlawh a, khum 10 awmna turah khum 6 chauh a leng a, a tlin loh lutuk avangin a chep a, ngaihtuahna thar seng a, building hlui la tha tho chei thar dan a awm chuan, khum dang 4 dah theih tum dan ngaihtuah mek a ni tih a sawi.