Ruihhlo-ah Red Alert

Ruihhlo-in Mizoram a luhchilh thuk tawhzia kan hria a, sawrkar, pawl, kohhran, khawtlang leh mimal kan tangho a, ruihhlo kan do mek a. Nasa taka ruihhlo kan do chung pawhin, a zualzawpui vailenhlo tih ang zawng zawng kan chang zo a. Tun hnai lawkah Mizoram leilung ngeiah Heroin lakchhuahna Poppy chinna hmun hmuhchhuah a ni leh ta.
Siaha district chhung Khaikhy-ah Poppy chinna hmunpui tunhnai khan hmuhchhuah a ni a, tihchhiat nghal niin poppy hmun siamtu hi zawn mek a ni. Poppy chinna hmun tihchhiat hi cheng nuai 32 hu vel nia chhut a ni.
Poppy chi hi Kuhva ro phur nia insawi ten a rukin kuhva ro zingah an lo phur tel thin a. Kum hmasa lamah pawh khan khawthlang lam pana kal lirthei atangin poppy chi thahnem tak hmuhchhuah a lo nih tawh kha. Kuhva ro phenah ruihhlo leh a kaihhnawih tawlh ruk a ni tih finfiahna tha tak a ni awm e.
Tunah chuan lirthei chhung atanga poppy chi manchhuah aia turu zawk, kan ram leilung ngeia heroin kung thlai a lo to ta hi, Mizoram hian ruihhlo-ah hian inralrinna dar tawp ber Red Alert kan khawn rik a hun ta hle. Ruihhloin kan ram a chiahpiah dan thlir hi chuan, Inralrinna dar Yellow Alert leh Blue Alert hi kan khawnrikna a rei tawh a, tunah hi chuan Red Alert khawnrik ngai dinhmunah kan ding chiang ta hle niin a lang.
Ruihhlo man chhuah dan pawh, tunhmaa Gram ni thin kha, tunah chuan Kg a ni ta a; tunah chuan kan ram leilungah a lo to ta ngoh mai a ni.
|halai leh thalai hnuai naupang zawkte-ah ruihhlo hian bu a khuar thuk tual tual a. Tunhma chuan a rukin hmuh phak lovah ruihhlo ngaiten ruihhlo an ti a, a rukin an zuar a, a rukin an lei a. Tunah chuan chhun engah, khawlaiah ruihhloa inchiau ngawng ngawng te, ruihhlo hralha khawlaia inpe lai te kan hmu ni tin ta. Hei bak baka Red Alert khawnrikna tur dang hi a awm ta lo a ni ber.
Red Alert hi, ‘a kaw tawpah kan tang ta, thih leh dam kar a ni ta, ral raih inhuama hmelma lo hmachhawn tur’ tihna a ni ber awm e. Chutiang ‘spirit’ pu chunga hma kan lak loh chuan, kan hmelma ruihhlo hian min bawhbet hlen mai dawn a ni.