Zoramah Hmeichhiate Ni hmang

March 8 kha Hmeichhiate Ni (International Women’s Day) 2024 a ni a. Khawvel hmun dang rualin Mizoramah pawh hman a ni. Aizawla a lawmna pui ber hmanpuitu Social Welfare &Tribal Affairs, Women and Child Development minister Lalrinpuii chuan Mizo hmeichhiaten hma an sawn zel rualin, an thlen china lungawi mai loin, kohhran leh khawtlangah theihtawpa thawh a tul tih a sawi.
Hmasawnnaa hmeichhiate dinhmun pawimawh zia a sawi a. Mawhphurtute zinga hmasa ber chu nute an ni, tiin, “Hmeichhiate dinhmun chawikan zel a tul a, hmachhawp zingah chhungkaw enkawtu nih leh ram hruaitu atan hmeichhia tel tam a tul a ni,” a ti.
He hun hi Women & Child Development (WCD) department, State Legal Services Committee leh International Women’s Day Organising Committee hmalaka buatsaih a ni a. He ni pual hian, kumtina an tih thin angin, Ministry of W&CD kaihhruaina siam zulzuiin, March 1 atang khan nitin a lawmna buatsaih a ni.
Minister bakah hian High Court judge, Justice Marli Vankung leh Padma Shri B Sangkhumi te chu sawm bik an ni a. Hmeichhe MLA pahnih – Prova Chakma leh Baryl Vanneihsangi Tlau, social worker & entrepreneur Lalthangpuii Sailo (Biate), Lalrinmawii (Thakthing) leh Nunherdangzeli (Baktawng) te chu Women’s Day pual hian chawimawina hlan an ni.
Programme hman zawh hian Vanapa Hall atanga Aijal Club Park inkarah IWD Organising Committee kaihhruaiin ‘IWD parade’ neih a ni a. Govt Mizo High School Pipe band-in tawiawmin, college zirlai, MHIP member-te leh midang engemawzat an tel.
College of Veterinary Sciences and Animal Husbandry (CVSc & AH) Central Agricultural University Selesihah pawh International Women’s Day hman a ni a. He college-a hmeichhe zirtirtu (faculty), thawktute leh post graduate chin zirlaite an tel.
CVSc & AH dean in-charge Prof Fazal Ahmed chuan hmanpuiin, hmeichhiate pawimawh zia leh hlut zia a sawi a. Kumin Women’s Day thupui “Count Her In: Invest in Women: Accelerate Progress” hmangin assistant professor Dr Lallawmzuali Ralte chuan hmeichhiate hmakhua tih chak zel a nih theihnan leh hmasawmna tur lam hmangin powerpoint presentation a pe a; he thupui hmang vek hian group 7-ah inthenin sawiho a ni.
International Women’s Day lawmna hmasa ber chu kum 1911 khan neih a ni a, Mizoramah chuan kum 2005 atang khan hman tan a ni. Kumtin thupui neih thin niin, kumin chhunga thupui (theme) atan “Telh ve la : Ring ngam la : Hma sawnna i hmu ang” tih a ni. Campaign thupuiah “Huapzau zawka infuihphurna” tih hman a ni.