Hmahruaitu thar Arsenal

Inrinni zana English Premier League khelhah Arsenal chuan Kai Havertz goal thun hmangin Brentford an hneh a, Liverpool leh Manchester City lehpel lailawkin EPL hmahruaitu thar an ni. Arsenal an chak rual hian top 4 huang luah phak hram tum Manchester United in hnehna an chang ve bawk.
Hmahruaitu thar ni tura chak mamawh Arsenal hian Emirates Stadium-ah 15-naa awm mek Brentford an mikhual. Gunners hi tunhnaia khel tha, EPL a goal thun thei tak an nih vangin Brentford lakah awlsam taka chak tura ngaih an ni a. An mualah khel tha viau mah se an chak zo lo teuh viau thung. Hun rei tak chhung 1-1 a an inhnehtawk hnuin hun tawp dawna Havertz goal thun an chakpui thei hram a, point thum hlu tak an hmu.
Arsenal tan hian West Ham atanga an lak fuh tak Declan Rice chuan minute 19-naah defender Ben White siamsak atangin hmahruaina goal a thun. Rice hian Arsenal tan season kal mekah goal ruk a thun tling der tawh a. Hei hi West Ham-ah kum hnih chhunga a goal thun aiin a tam tawh zawk. A club thar Arsenal-ah puitling zawkin a inlan a, Rice khel tha chho ta viau hi England tan chanchin tha, thu hriat nuam tak a ni nghe nghe. Declan Rice rualin defende Ben White pawh a khel tha chho viau a. White hian England tan hmun chak a beisei sang deuh deuh zel.
Rice goal thun hnu hian goal dang a luh belh lawk thei lova, Gunners in an hun tha an hloh. Mualneitu lamin an hun tha an hloh hnuin mikhual team in goal an thun ta tlat thung. Chawlhlawk dawn hnaih minute 45+4 ah Yoane Wissa chuan Arsenal si nghak Aaron Ramsdale chetsual a hrem a, goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm zui viau a, si nghak Ramsdale awmhmun fuh tawk loh vangin Ivan Toney chuan Brentford hmahruaina goal a thun teuh hle a, Ramsdale hian a mualpho lutuk tur a khuhmawi thei hram. Hun rei tak goal a luh belh theih loh hnuin hun tawp dawn hnaih minute 86-naah Kai Havertz chuan Ben White siamsak atangin hma an hruai nawn lehna goal a thun a. Havertz goal hi an chakpui zui ta a ni.
An muala point thum an hmuh hmangin Arsenal hian an chunga awm Liverpool leh Manchester City an lehpel a, khelh 28 atanga point 64 hmuin hmahruaitu thar an ni. Team lian pahnih; Liverpool leh City te hi Pathianni zan khan an inkhel a, chak an awm a nih chuan Arsenal lehpelin table hmahruaitu thar an ni thung ang.
Inrinni ziana inkhel dangah Manchester United chuan Old Trafford-a an mikhual Everton chu si hnih faiin an hneh a, top 4 huang luah phak beiseina thar an nei.
Old Trafford-a inkhelah hian United in an khel tha viau a, Garnacho a langsar hle. Alejandro Garnacho hian minute 12-na lekah penalty a hlawhchhuak. He penalty hi Bruno Fernandes chuan harsatna tawk lovin a pet goal a, hmahruaina goal a thun. Argentina rawlthar Garnacho hian minute 36-naah penalty a hlawhchhuak zui leh a. Penalty pahnihna hi Marcus Rashford chuan goal-ah a chantir a, an hmahruaina a tizau.
United hian chawlhlawk hmain goal hnih thun mah se, chawlhlawk hnu lamah goal an thun belh thei lova, an mualah 2-0 a hnehna changin point thum an hmu.
Inrinni zana inkhel dangah Wolves chuan 2-1 in an mikhual Fulham an hneh a. AFC Bournemouth leh an mikhual Sheffied United chu 2-2 in an inhnehtawk a. Crystal Palace leh Luton Town te 1-1 in an inhnehtawk ve bawk.