Power man ban vbch.144 March-ah pek zawh beisei
Mizoram chuan power leina leh a kaihhnawihah leiba cheng vaibelchhe 144 chuang a nei mek a, March thla chhung hian rulh zawh tum a ni.
Assembly Session-a zawhna chhangin Power & Electricity minister F Rodingliana chuan tun dinhmunah power leinaa ba an neih hi kumin February 16 thleng khan, generating company-ah Rs.127,08,09,493; transmission company-ah Rs. 16,67,16,173 leh North East Load Dispatch Centre (NERLDC) ah Rs. 49,83,094, a vaiin Rs. 144,25,08,760 a ni tih a sawi.
Power bill ba nei lo turin ZPM sawrkar chuan policy-ah an dah a, chief minister hmalakna in kumin March thla chhung hian power leina ba hi rulh vek an tum tih a sawi a ni.
Power & electricity department chu corporate-a leh tumin hemi lam hi an hawi tan a, power-a intodelh phawt a, chumi hnua hma lak turin an inbuatsaihna kawng tinreng chu corporate lam hawi zawng zel a ni tawh tih F Rodingliana hian a sawi.
Tlawng Hydro Electric Power din turin sawrkarin hma a la mek tih sawiin, “A tirah Central Water Commission (CWC) ruahman dan chuan megawatt 54 pechhuak thei tur a ni a, a hnuah CWC vekin 120MW turin hma thar a la a, sawrkarin ngaihtuahna thar hmangin MW 24 pechhuak tura ruahman a ni leh ta zawk a ni,” a ti.
Tlawng chu thal laia tui a kang thin avangin Aizawl tui lakna atan bakah khualzin hip tura cheibawl theih tur a nih avangin, MW 24 hi chu hmun dang atanga sum an hmu lo a nih pawhin state suma tih mai theih tura ngaih a ni tih P&E minister hian a sawi a. DPR la tih zawh a nih loh avangin a chim chin tur leh compensation pek ngai a awm dawn em tih hriat theih a la ni lo tih a sawi a ni.
Tuivai lui khuah tum chu a tirah MW 210 a ruahman a ni a, an zirchian hnu ah MW 150 vela ti tla in, department hotuten thar thawh tumin sawrkar laipui hotute an dawr mek tih a sawi a. Mat lui khuaptu tur pawh an zawng a. Hydro power neihnan, investigation, DPR siam leh a tul anga hman atan tun sawrkarin cheng vaibelchhe 7 a dah tih a sawi bawk.
“Power mamawhna a sang zel a, Union Power minister min hrilh danin tun atanga kum 5-ah chuan lirtheite pawh electric current hman uar tum a ni dawn a, hmarchhak lam, Mizoram telin hydro electric power siamchhuah kawnga tang turin min ti a ni,” F Rodingliana hian a ti a. Hei vang hian Tuivai khuahna turah pawh central lam an inhawng angreng viau tih a sawi a ni.