DAY-NULM Festival hmang
March 13 atang khan district hrang hrangah UD&PA dept hnuaia City Mission Management Unit buatsaihin DAY-NULM (Deendayal Antyodaya Yojana- National Urban Livelihood Mission) Festival 2024 vawi 2-na hman a ni. March 15 thleng a awh ang.
Lungleiah chuan district bawrhsap Ramdinliani’n Festival hi a hawng a. DAY-NULM hnuaia beneficiary-ten stall 47 hawn a ni. Stall 47 zinga 36 hi self help group (SHG), 4 hi street vendors, 6 hi SEP loan la tawh leh 1 hi ESTP (Employment through Skill Training & Placement) training tawh a ni.
Champhaiah chuan district bawrhsap James Lalrinchhana’n a hawng a. Stall 30 siam niin, DAY-NULM beneficiary-ten an thil siam leh thiamthil dehchhuah an pho chhuak a. Tlawhtu naupangte tan intihhlimna siam a ni bawk. Tunah DAY-NULM Champhai hnuaiah SHG 115, anmahni enkawltu community organizer 2 leh urban resourse person 6 awmin, SHG ho hi thlatin vawi 2 an tlawh thin.
Serchhipah chuan addl DC James Lalnithanga’n a hawng a. Stall 20 awmin, UD&PA hnuaia thiamthil zirchhuak leh SHG ho siam thil chi hrang hrang phochhuah a ni. Serchhip district-ah hian SHG 91 an awm a, UD&PA hmalakna in thiamthil zirchhuak mi 2057 awm tawhin, an zinga 465 chu hna hmuhsak tawh an ni. Self employment programme kaltlangin subsidised loan and pe a, Support to Urban Street Vendors (SUSV) hnuaiah licence 192 pek a ni tawh bawk.
Khawzawlah pawh addl DC Lalfakzuala’n a hawng a. Stall 23 awmin, SHG hoin stall 12 an luah a, ESTP-in stall 8 luahin, a bak stall 3 chu street vendor-in an luah a ni. Khawzawlah hian tunah SHG 39 awmin, official-a inziaklut street vendor 68 an awm. Beneficiaries 1000 chuang an awm tawh a ni.
DAY- NULM Festival (Exhibition -cum- Sale) hi DAY-NULM hnuaia beneficiary-te tan inphochhuahna hun tha leh mipuiin an hmelhriat zau theihna’na duan leh buatsaih a ni a. UD&PA hnuaia central scheme pakhat niin, khawpuia cheng mi harsa leh dinhmun hniam zawkten an thiamthil neih hmanga dinhmun tha zawk leh eizawnna tha zawk an neih theih nana kalpui a ni
Kolasibah chuan district bawrhsap John LT Sanga’n a hawng a. SHG 25-in an thil siam leh thar chhuah an pho chhuak a ni. UD&PA hnuaiah Kolasib district-ah hian self help group 34 an awm mek a ni.