EMRS sak mek leh dil belh awm

Eklavya Model Residential School (EMRS) chu Mizoramah 11 sak tawh a ni a, 6 hi a taka kalpui mek a ni tawh.
Social Welfare, Tribal Affairs, Women & Child Development minister Lalrinpuii’n Assembly Session-a zawhna a chhannaah hei hi sawiin, tuna EMRS function mek 6 chu – Lunglei, Serchhip, Lawngtlai, Chawngte (Lawngtlai district), Tuipang (Siaha district) leh Ngopa (Saitual district) an ni a. Sak mek 5 – Tlangnuam (Aizawl district), Zawlnuam (Mamit district), Bilkhawthlir (Kolasib district), Tlungvel (Aizawl district) leh Niawhtlang (Siaha district) ah a awm a ni.
EMRS sak mek bakah hmun 6 – Hnahthial, Lungsen (Lunglei district), West Phaileng (Mamit district), Khawzawl, Darlawn (Aizawl district) leh Khawbung (Champhai district) a din belh tum a ni a. Khawbung hi a hmunhma tihfel tawh niin, Lungsen leh hmun dangte nen a building sak thuai tum a ni a, a satu tur pawh thlan an ni tawh tih a sawi a ni.
Ministry of Tribal Affairs-ah sawrkar hmasa hun lai, kum 2021 khan Aibawk, Thingdawl, East Lungdar, Reiek, Bunghmun, Sangau, Phullen, Champhai leh Bungtlang South tan EMRS an dil belh tih minister hian a sawi a. Minsitry lam chuan, tribal naupangte zirna kawng hrang hranga hma an sawn zual zel theihna’n leh hmun tha an neih theihna’n EMRS hi a kalpui tih sawiin, zirna senso zawng zawng a thlawn vek a nih bakah hostel siamsak an ni a. Seat erawh a tlem deuh thin avangin entrance test tih a ngai ve thin tih a sawi.