Exam zawhna hriatlawknaah minister bang ngam turin phut

HSLC Exam-a social science zawhna thenkhat hriatlawk theih avanga zirtirtu chunga hma lak a nih laiin, a changtu minister berin a mawha a la ngam lo nia sawiin, bang turin an phut tih Congress Thalai leh National Students’ Union of India (Mz) chuan an sawi.
Congress Thalai Hqrs. senior vice president Ngurdingpuia Pachuau chuan, MBSE-in 2024 HSLC exam a buatsaiha Social Science subsubject-a zawhna thenkhat putru nia hriat avanga exam bei mektu zirlai tam tak rilru hrehawm leh chiai taka an awm chu pawi an tiin an lainat a. He thil thleng avanga harsatna tuartu zirlaite thlamuanna thu leh zirlaite tawrhna avanga pawi tihna thu kam khat mah Education minister-in a la sawi lo hi mak an tih thu a sawi.
Assembly Session-a HSLC exam zawhna putru nia hriat avanga Education minister statement an zirchiannaah, a changtu minister berin mawhphurhna la ngam loin, mawhphurna lak a hneka fihlimna tur leh hmai phihfaina tur zawng a, a taka thawktu zawkte tawrhtir tum zawnga hma laah minister hi puhin, a nihna a tlin loh zia a tichiangah an ngai tih a sawi a. MBSE dan, Malpractices Act 1990 awm reng lai a, dan pangngai pela tisualtu nia ngaih Aizawl Police Station-a FIR thehluh hmanga case siamsak leh mantir a ni te, court case hmanga jail thleng tantir a ni chu hriatthiam harsa an tih thu Congress Thalai hruaitu hian a sawi bawk.
“Education minister-in a mawhphurhna la ngam lo a, midang tawrhtir zawnga hma a la hian hun lo la kal zel turah zirtirtute tan exam question siam leh exam kaihhnawihah thawhhona a tihchhiat a hlauhawm a. Mizorama zirna kalzel turah pawh nghawng tha lo tak a neih kan hlau a ni,” a ti. Minister nihna chuan lalna leh thuneihna ringawt a keng lo tih hria a, tuna thil thleng avanga a tuartu zirlai zawng zawng hnemna leh thlamuanna thuchhuah siam turin an phut a, a mawhphurhna a ni tih pawm a, bang turin an phut tih a sawi a ni.
Samagra Shiksha Mizoram hnuaiah pawl 11-12 zirtirtu tur post 161 atan thalai 952-in kumin February 2 khan written exam an nei a, heta tling mi 312-in February 12-16 inkar khan interview an hmachhawn leh tih Ngurdingpuia Pachuau hian sawiin, “Vawiin thlenga result a la chhuak thei lo hi mak kan ti a. Department official-te ring loa Interview Board-a department pawnlam mi observer awmtir a ni hian, minister-in official-te leh Interview Board a rin tawk loh zia a tichiang a. Hetiang hi exam kaltlanga hnalakna (public services) reng rengah a la awm ngai lo,” a ti. Observer-te hmanga duhzawng lak tir tumna a nih theih bakah minister berin department officer-te a rin tawk lohna avang hian mumal takin Mizoram education hi a kal dawn lo tih a chian thu a sawi bawk.