Fur hma in Kolasib district-a kawngpui siamtha turin hrilh

Kolasib district huamchhunga national highway kawngpui (main road) siamthat dan tur relin Nilaini khan district bawrhsap John LT Sanga kaihhruaiin thutkhawm a ni.
PWD National Highway Division-III hotute, NHIDCL hotute, contractor-te, YMA, MHIP, MUP leh Kolasib Development Committee aiawhte, Mizoram Tipper Association Kolasib Sub-Hqrs leh maxi cab aiawhte an tel.
Bawrhsap chuan Kolasib district chu Assam nena inri, Mizoramin chak a lakna kawngpuiin a paltlang a ni a, district chhunga national highway enkawl kawngah chak taka hma lak a tul, tiin, chumi tihhlawhtlin a nih theih nan ngaihtuahna seng turin a chah a ni.
Kolasib Development Committee hruaitute chuan an district-a national highway kawng chhe lutuk an vei avanga hma an lak dan sawiin, contractor-te chu fur ruahtui tlak hma, March chhunga kawng siam zo tura hriattir an ni tih sawi a ni. Sub-Hqrs YMA Kolasib hruaitute pawhin contractor-te hi March 31 ralhmaa kawng siamtha tura hun an pek thu sawi niin, national highway bakah Kolasib district hmun danga kawng siam mek an tlawh thu an sawi bawk.
PWD National Highway Division-III senior executive engineer R Lalduhthlanga sawi danin, Bilkhawthlir to Kolasib inkar chu Sadguru-in a siam a, Kawnpui- Khamrang pawh Sadguru thawh a ni. Khamrang- Buichali chu contractor an ban (terminate) avangin a khuar zualpui department lamin an hnawh mek.
Kawng chhiaah hian PWD lamin hma an la ngawt thei tawh lo a, contractor-te chu siam tura hriattirna lehkha an pe a, contractor-te nen an thukhawm thin. Contractor-te an chet hleihtheih loh avangin PWD-in an hnawh a, dispute notice an hmuh avangin hma lak a harsa a. Bilkhawthlir atanga Kolasib Leitan inkar siamtu contractor-te chuan MP inthlan zawh hmain siam an intiam a ni.
Contractor-te chuan lung hman turah harsatna an tawk nia sawiin, harsatna an neih dang pawh an sawi a. Kolasib district hmun hrang hranga kawng siamthat hna chu a thawktuten fur ruahtui tlak hmaa thawk zo hman tumin hma la se, tih a ni.