Dan niloa contract hna chhuhnaah CEM hlui nupuiin thiam loh chang

Chakma Autonomous District Council chief executive member hlui nupui Sujata Chakma chu tih luihnaa dan dikloa mi contract hna chhuhnaah court-in thiam loh a chantir.
Prevention of Corruption Act Court special judge Dr HTC Lalrinchhana’n hemi chungchanga thutlukna Zirtawpnia a tihchhuah takah, kum 2012 khan 13th Finance Commission chuan CADC Session Hall sakna atan cheng nuai 300 a ruahman a, hemi atang hian nuai 232 chu Mizoram sawrkarin CADC kutah a pe a ni.
CADC hian RV Hluna, Edenthar Veng Aizawl chu Rs. 2,50,63,138 hmanga he hna hi thawk turin 2013 March 14 khan inremna a siampui a, hna hi 2015 March 14-a thawk zo tura inremna siam a ni. Hna thawk tanin, 2nd instalment dawn a nih hma deuhin chutihlaia CADC chief executive member Buddha Lila Chakma chuan RV Hluna hnen atanga chhuhsakin a nupui Sujata Chakma chu inremna ‘power of attorney’ (deed of agreement) hmangin a thawh chhunzawm tir a ni.
Court-a thuhretute thusawi atanga tarlan danin, Buddha Lila Chakma hian contractor hnenah hian harsatna hrang hrang siam luiin, dan anga a thawh tur ang bak pawh a thuneihna hmangsualin thawh luih tir a tum thin a, contractor hian Buddha Lila Chakma nupui Sujata Chakma hnenah hna hi pe lo thei lo dinhmunah a ding tih sawi a ni.
Buddha Lila Chakma hi a thubuai ngaihtuah laiin 2023 October 10 khan a thi a, a nupui thubuai chauh hi ngaihtuah zui a ni ta a ni. He thubuaiah hian Sujata Chakma hi a pasal nen inthurualin thiam lohna a nei ve em, tih chu ngaihtuah tur ber a ni.
Contractor pangngaiin hna a thawh hman atanga a sum sen leh Sujata Chakma hnena sum pek hrang hrang chhut leh paih a nih hnu ah Sujata Chakma leh a pasal Buddha Lila Chakma te sum tihchingpen hi a lo berah Rs. 34,66,585 a ni tih court hian a sawi.
Heng avangte hian Sujata Chakma hi IPC leh PC Act hmanga thiam loh chantir niin, convict a nih avangin bail-a a lo chhuah tawhna chu sut (cancel) a ni a, lung ina dah luh nghal turin court hian a ti.
Thuremnaah hian court chuan PWD hnathawh kaihhruaina – Central PWD Manual-ah hnathawktu contractor-in hna petu (tender accepting authority) phalna in a contractor class pui emaw a ni aia class sang emaw hnenah chauh contract hna hi a hlan chhawng thei a, contractor ni lo hnena hna hlanchhawn hi phal a ni lo thung. Mizoram sawrkar department dangte tana kaihhruaina Mizoram Transparency in Public Procurement Act 2008 leh Mizoram Transparency in Public Procurement Rules 2000 ah phei chuan hetianga contract hna midang hnena inhlanchhawn dan hi a awm lo, tiin a sawi a ni.