Zirlaite tan Mizo thil hriat theihna tur comics siam tum

Mizo tlawmngaihna leh Mizo thil pawimawh hrang hrang dahna comics bu siamin, zirlaite chhiar turin chhawp a ni dawn tih School Education minister Dr Vanlalthlana chuan a sawi.
Samagra Shiksha leh Central YMA chuan thawhhona thuthlung an ziak a, he hun hmanpuitu School Education minister chuan, kawng hrang hrangin zirna tihhmasawnna tur thawh a ni dawn a, school-a zirlaite chhiar atan comics siam tum a ni a, comics-ah hian Mizo tlawmngaihna leh Mizo thil pawimawh chi hrang hrang bilhluh a ni dawn tih a sawi. “Zirlaiten Mizo thil an hriat phah thei dawn a ni,” tiin, hetiang hi kum kalta lamah a bial chhungah hlawhtling takin a lo kalpui tawh tih a sawi a ni.
MLA-ten an bial chhung tihhmasawn nan kum 5 chhungin nuai 1000 an nei thei tawh dawn a, thil tangkai tak tak thawh nan a hman theih a. Zirna atana hman theih dan kawng dap a pawimawh tih a sawi.
School-a thawk zirtirtute attendance lak nan KAI tih application siam a ni a, he hmanrua atang hian zirtirtu kal that leh that loh awlsam takin en theih a ni tih a sawi bawk.
Central YMA president Lalhmachhuana chuan YMA-in quality education a buaipui mek tih sawiin, “Zirlaiten zirna tha an phu a, tun dinhmunah chuan zirnaah khawpui leh thingtlang a la inthlau viau a, hei hi ngaihtuah a ngai hle,” a ti. Sumdawnna atana zirna kalpui an tam ta chu an ngaimawh thu leh khawng zawka kal an duh thu te, zirlaite lehkha chhiar tur lakkhawm dan turah ngaihtuahna an sen mek thu te a sawi a ni.
Samagra Shiksha leh Central YMA thawhhona thuthlungah hian Samagra Shiksha state project director Lalhmachhuana leh Central YMA president Lalhmachhuana ten hming an ziahhnan a, CYMA general secretary Prof Malsawmliana leh Samagra Shiksha additional SPD H Lalhruaitluanga ten hriatpuina an ziak bawk.
Thawhhona thuthlungah hian naupang school kal lo dapchhuah, naupang rualbanlo zirna kawnga thawhhona tur, YMA Group leh Branch hrang hrangah school kai chhan (Vidyanjali) kawnga hma lak, zirlaiten ngaihsan leh hnualsuat tur an hriat theihna’n rilru dik an put theihnana thawhho, tih te a tel a ni.