EB kalpui dan scam leh corruption sang ti

Election Commission of India (ECI) in electoral bonds (EB) scheme donors te a tarlan hnuah Congress te chuan bonds kalpui dan chu ‘scam leh corruption sang ber’ tiin an sawi.
Congress general secretary (communication) Jairam Ramesh chuan data te chuan BJP te ‘corrupt tactics pali’ company 1,300 leh mimal atanga Rs 6,000 crore chuang kum 2019 atanga an dawn dan a lailang a ni, a ti a.
Ramesh chuan Finance Minister chu ‘Political party a khawi berah nge mimalin sum an pek dan kimchang’ tarlang tura ngen bawkin chu chuan sawihona awm reng a titawp ang a ti bawk.
Ramesh chuan, “Company tam tak electoral bonds an donate hnua sorkar atanga hlawkna nasa tak chang nghal an awm a ni. Megha Engineering & Infra te hian electoral bonds Rs 800 crore chuang an pe a. April 2023 khan Rs 140 crores an donate hnu thla khat lekah Rs 14,400 crore man Thane-Borivali Tunnel Project an hmu nghal a ni,” tiin a sawi.
“Jindal Steel & Power te pawhin EBs ah Rs 200 crore 7 October 2022 khan an donate hnu ni thum lekah Gare Palma IV/6 coal mine chu 10th October 2022 khan an chan nghal a ni,” tiin a sawi bawk.
Congress leader chuan data pholan tak te chuan chiang takin Enforcement Directorate (ED), Income Tax (I-T) leh Central Bureau of Investigation (CBI) tena an dap zin deuh te chuan BJP hnenah EBs an donate tam zual zel a ti bawk a.
“BJP te Hafta Vasooli strategy hi a simple viau mai – ED/CBI/I-T te hmangin dap thut kalpui hnuah compnay him nan ‘hafta (donation) in a zui nghal zel a ni. Donor top 30 zinga 14 te chu agencies tena an dap thut tawh an ni’” tiin Ramesh chuan a sawi bawk.
“Kumin kumtir lamah pawh khan investigation neihnaah ED/CBI/I-T raids company te chu electoral trusts kaltlanga BJP te hnena donate tura turluih tih hriatchhuah a ni a. Heng company ngai tho te hian EBs ah donation pe zui zelin chung zingah chuan Hetero Pharma leh Yshoda Hospital te pawh an tel a. I-T department chuan Shridi Sai Electricals te chu December 2023-ah an raid hnuah January 2024 ah Shirdi Sai Electricals te hian Electoral Bonds hmangin Rs 40 crore an donate zui nghal a ni,” tiin a sawi bawk.
Ramesh chuan Future Gaming and Hotels te chu donor lian ber niin Rs 1,200 crore chuang an donate a ti bawk a. “A kal dan chu hetiang hi a ni: 2nd April 2022 ah ED ten Future an raids a, a hnu ni nga, 7th April-ah Electoral Bonds kaltlangin Rs 100 crore an donate nghal a ni. October 2023 ah IT department ten Future an raid leh a, he mi thla vek hian Rs 65 crore an donate leh nghal bawk,” tiin a sawi.
Congress te chuan thil kalphung awmze nei tak a awm ti bawkin ‘company tena Central sorkar atanga eng emaw an dawn hnuah electoral bond hmangin company te chuan an chhang let zel a ni’ a ti bawk a.
Vendanta te chuan March 3, 2021 khan Radhikapur West private coal mine chu an chang a, April 2021 khan company te chuan EBs kaltlangin Rs 25 crore an donate nghal a. Chutiang bawkin Megha Engineering and Infra te chuan August 2020 khan Rs 4,500 crore Zojila tunnel project an chang a, Octiber 2020 ah vek EBs kaltlangin Rs 20 crore an donat enghla bawk. Megha te pawhin BKC bullet train station contract chu December 2022 ah hmu in he mi thla vek hian Rs 56 crore an donate nghal bawk tiin Ramesh chuan a sawi bawk a.
Congress leader chuan money laundering pawh shell company hmanga kalpuiin a awm bawk a ti bawk a, a chhan ber pawh EBs scheme chuan khuahkhirhna siamin company profit atanga percentage tlemte chauh chu donate theiha a siam vang a ni a ti bawk a.
“Rinhlelhawm tak tak a tam hle a, Qwik Supply Chain Limited chuan Rs 410 crore an donate a, mahse an share capital pumpui chu Rs 130 crore chauh niin MoCA [Ministry of Corporate Affairs] filings ah chuan a ni si a ni” tiin Ramesh chuan a sawi bawk a.
Congress te chuan electoral bonds data tihchuahah march 2018 atanga April 2019 inkar a awm lo an ti bawk.