Phal nei loa lei chhung tui verhtute hrem theih

Mizoram hmun hrang hranga enfiah tawhnaah leh phalna nei loin mahni thua tui verh (lei verh a lei chhung tui siak chhuak) an awm thin tih hriat a ni a. Sawrkar hriattirna dinglai angin, enfiah leh zirchian loha tui verh hian harsatna a thlen thei a, tui verh turten phalna an lak a ngai tih mipui hrilh an ni.
Heti chung hian phalna nei loin tui verh an la awm zel nia sawrkarin thu dawn avangin, mipui hriat tur leh zawm atan thu a tichhuak leh a. Lei chhung tuiverh reng rengin thuneitute hnenah phalna lak hmasak tur a ni.
Mizoram Ground Water (Control and Regulation) Act 2023 hmangin tuiverh dilna leh enkawl zui zelna tur hi dan siamthat mek niin, peihfel tep a ni a. A dil dan peihfel hma chuan tui verh lama hma la rih lo turin mipui hriattir an ni.
‘Phalna nei loa tui verh hi Mizoram Ground Water Act 2023 section 29 hmangin hrem theih an ni a. Phalna nei loa tui verh ten buaina an tawk a nih pawhin anmahniin mawh an phur ang,’ hriattirna hian a ti.