Jake Paul nen inhnek tur Mike Tyson a inbuatsaih

Boxer rothap ber te zinga mi, a vanglaia heavyweight boxing champion te pawh lo ni zak zak tawh, Mike Tyson, kum 57 leh YouTuber atanga boxing lama kal leh ta Jake Paul, kum 27 te chu July ni 20 hian AT&T Stadium, Arlington-ah boxing ring chhungah an inhmachhawn dawn a, hei hi tun kum 19 chhunga Tyson-a official fight neih leh hmasak ber tur a ni. He inhnek hi Netflix-in an tichhuak dawn a ni.
Tyson hi Tool singer Maynard James Keenan-a’n a training velah a buaipui nasa viau a, amah Keenan pawh hi Brazilian jiu-jitsu black belt a ni a, ani hian Cottonwood, AZ Verde Valley BJJ martial arts school neiin, he gym-ah hian Tyson pawh a training thin a, Maynard hian a nupui Lei Li Keenan nen Tyson thla an lakpuina pawh Instagram-ah a phochhuak a,”Tunlai chu ka intithei ve rih deuh dawn,” tiin a caption a dah.
Tyson hian a boxing career-ah 50-6 record (44 knockouts) a nei a, November 2020 khan world champion hlui ve tho Roy Jones Jr. nen exhibition match neiin, chak zawk awm loin draw result sawi hlawh takin an tawp a, tun hi mipui hmuh tura a inhnek lehna hmasa ber tur niin, official fight-ah phei chuan kum 19 chhunga a vawi khatna tur a ni.
Bizaardvark star thin Jake Paul hi YouTube-a prank video vel siam atanga Forbes list-a khawvela infiammi hlawh tam zuala inhlangkai thei a ni. 2018 khan boxing lamah a lut a, MMA fighter eng emaw zat leh professional boxer bakah basketball player te thleng ring chhungah a hmachhawn a, tunah hian 9-1 record ( knockout) a nei a, a hneh loh awm chhun hi Tommy Fury niin, nikum February-a inhnek kha an ni.
Mi troll vel hnehsawh tak Paul hian tuna Tyson nena an inhmachhawn tur pawh hi boruak siam nan video a siam leh nual tawh a, pakhat chuan Tyson-a’n a hmaia tattoo a neih an deuh ama version te a insiam chawp a, 1997-a Tyson-a’n Evander Holyfield-a beng a seh thlak sak boruak te chawk tho lehin plastic a siam beng lem a seh thla lai te pawh a tilang.