Oral Health Day hmang

Kachhung faina leh hriselna kawnga inzirtirna ni ‘World Oral Health Day’ chu Nilaini khan hman a ni a. Aizawlah pawh Health & Family Welfare principal secretary Dr Vanlalsawma hoin hman a ni.
Oral Health Day denchhena hun hmanah hian Civil Hospital Aizawl (Dental) head of department Dr Zothantluangi chuan kumin thupui ‘A Happy Mouth Is A Happy Body” tih hmangin presentation a pe a. Kachhung hriselna ian nasa takin kan taksa chhung lam landanah awmzia a nei tih a sawi. Tunah hian khawvel pumah mipui vaibelchhe 3.5 ten kachhung lamah harsatna an tawk mek a. Mizoramah pawh zuk leh hmuam tih nasat avangte, ei leh in uluk tawk loh avangte in nasa takin kachhung natna hrang hrang kan vei nasa a. Ram pum huap pawhin hemi kawngah hian hmasawnna tur tam tak kan nei, tih a sawi a ni.
H&FW principal secretary chuan thangthar zingah kachhung faina ngaipawimawh, zuk leh hmuama fihlim an tam tial tial chu thil lawmawm tak a ni tih a sawi a. Kan zaithiamte pawh hemi kawngah hian mipui entawn tlak, ambassador ni zel tura a duh thu a sawi bakah National Oral Health Programme (NHOP) thawktute hmalakna fakawm a tih thu a sawi bawk.
NOHP state consultant Dr Malsawmdawngzuali report danin, Oral Health Programme (OHP) hi Mizoram district 11-ah kalpui mek a ni a, 2023 April leh 2024 February inkar chhung khan Mizorama OHP hnuaiah kachhung natna chi hrang hrang 17066 enkawl a ni.