EVM thliarfelin an endik

April 19-a Mizorama Lok Sabha inthlanpui neih huna vote thlakna atana hman tur electronic voting machine (EVM) thliarfela endik thawhkhatna chu Ningani khan district hrang hrangah neih a ni.
EVM hian control unit (CU) leh ballot unit (BU) bakah voter verifiable paper audit trail (VVPAT) a kengtel a. Heng khawl ho hi inthlanna atana hman turte chu Election Commission of India duh danin first level checking (FLC) neih a ni a, ECIL engineer-te leh sawrkar official-ten political party aiawhte awm laiin EVM an endik hnuah, inthlanna atana hman theih turte chu strong room-ah sipai venhimna hnuaiah dah that thin a ni.
Inthlan thianghlim leh felfai a awm theih nan EVM randomization hi neih thin a ni a. Khawi constituency leh khawi polling station ah nge EVM khawl hi dah an nih dawn tih hi tute mahin an hre lawk lo a, computer kaltlangin serial number hmangin EVM khawl hi khawia hman tur nge tih thlan thin a ni.