SC-in Governor Ravi khak na hle

Supreme Court chuan Tamil Nadu Governor RN Ravi-an a conviction tihkhawtlai a ni chunga DMK leader minister atana a laluh duh miah lo chu a khak na hle a.
Chief Justice DY Chandrachud chuan Governor chuan ‘Supreme Court a pawisa lo a ni’ tia sawiin Centre chu, “Governor in Constitution a zawm loh chuan sorkar in eng nge a tih a?” tiin a zawt zui bawk.
Bench, Justice JB Pardiwala leh Justice Manoj Mishra te pawh awmna chuan Governor chu vawiin Zirtawpni ngeia DMK leader K Ponmudi chu minister atana lalut turin a ti bawk.
MK Stalin sorkar chuan Ravi an Pmundi state cabinet atana la lut duh lova Constitutional morality kalh a ni dawn tia chhuanlam a siam hnuah Supreme Court-ah an zualko a ni.
Ponmudi hi a hmain Madras High Court chuan asset case a neihah thiamloh chantirin MLA atanga disqualified a ni a, mahse Supreme Court chuan a conviction chu pause in kum hnih lung in tang tura tih chu a stay rih a ni. State sorkar chuan minister a lakluh leh a tumna chu Governor chuan a hremna chu suspend mai chauh a ni a, hnawl a ni lo tiin a lalut duh lo a ni.
“Naktukah i hnen atanga thu engmah kan dawng lo a nih chuan constitution zuiin Governor chu chetla ngei turin thupek kan chhuah ang. Tamil Nadu Governor leh a khawsak dan hi kan ngaimawh takzet a ni. He thilah hian eng mah inhnamhnawihna tur a nei lo, Supreme Court a namnul a ni” tiin Chief Justice chuan a sawi bawk a. “Kan thlithlai reng a, naktukah kan tichiang ang a. Kan ngaimawh takzet” tiin a sawi zui bawk.
Chief Justice chuan Governor chuan ‘Supreme Court a pawisa lo a ni’ tia sawi bawkin, “Amah thurawn pe tuten an pe tha tawk lo a niang” a ti bawk a. “Minister chungchangah thlirdan dan ka nei mai thei a, mahse, constitutional law angin kan kal a ngai a ni. Chief Minister in he pa hi ka ruat duh e a ti a nih chuan parliamentary democracy hnuaiah Governor chuan a ruat mai tur a ni. Ceremonial head of state a ni” tiin a sawi bawk a.
Justice Pardiwala pawhin conviction chu stay a nih tawh chuan ‘ka tianghlim tawh lo emaw ka bawlhhlawh e a tih theihloh’ a ti bawk a.
Ravi an minister atana Pondumi a ruat duh lo hi a office leh MK Stalin sorkar tena kum 2021 atanga inbakaihna an neih tam tak zinga pakhat chauh a ni a. DMK sorkar chuan Governor Ravi chu an hnathawh tibahlahah an puh bawk.
A hma pawhin state sorkar chuan Raj Bhavan in bill a pawm mai duh loh avanign Supreme Court-ah an lo zualko tawh bawk a. Chumi tum pawh chuan court chuan Governor chuan Council of Ministers te thurawn angin hma a la mai tur a ni a lo ti tawh bawk a. Chief Minister Stalin chuan nikum khan President Droupadi Murmu hnenah lehkhathawnin Ravi chu ban turin a lo ngen hial tawh bawk.
Mahse RN Ravi chuan Tamil Nadu sorkar chu a tul a tihah chuan harsatna a la siam zui char char tho a ni.