MCO hruaituten an hmalakna tur hrang hrang an sawiho

Mizo Cultural Organisation (MCO), Gen. Hqrs Gen. Executive Committee chu nimin khan Tourist Lodge, Chaltlang, Aizawl-ah thukhawmin zanriah an kilho.
Kumin atana MCO Gen. Hqrs Executive Committee thutkhawm hmasaber hi MCO President Robert Romawia Royte-in kaihruaiin, MCO Gen. Assembly 2024, rorel bawhzui dan tur te leh MCO Gen. Hqrs hmalakna tur pawimawh hrang hrang an sawihova. MCO hnuaia sub-committee te mawhphurhna hrang hrang an ruahman bawk.
Kumina MCO Gen. Assembly chuan kum 2024-2026 budget Rs. 11,70,000 a lo pawm tawh a. Sorkar laipuiah fund dila MCO hnuaia branch/affiliated club/sub-hqrs huap Festival huaihawt te, sorkar laipuia Ministry of Culture programme-a MCO te sawm ve an nih theih dan tur te, MCO branch/affiliated club/sub-hqrs te tlawh chhuah chungchang te, zirna in-a Mizo hnam lam leh zai lam zirtirtu nei tura hmalak chungchang te, zirna in-a cultural day hman chungchang te, Zo international Cultural Festival chhunzawm leh chungchang te, Mizorama hnam hrang hrang te tana Hnam lam kutpui huaihawt chungchang te leh Zo hnam peng hrang hrang aiawhte nena inkawm chungchang a lo rel tawh te bawhzui dan tur an sawiho bawk a ni.