Ventilator hmang rei record

Janusz Switaj chu tleirawl kum 17 mi lek a nih laiin a taksa peng hrang hrang che thei loin a zeng a, mahni tawkin a thaw thei ta lo. Mahse, he Polish tleirawl hi vawiin thlengin ventilator hmangin a la dam a, kum 30 leh ni 300 chuang ventilator hmangin a nung tawh a, medical ventilator hmanga dam rei ber record a siam.
Mahni tawkin a chesawn thei lo va, ama tawkin a thaw thei lo bawk a, mahse, chuti chung chuan tawmsen reng a tum bik chuang lo, a zin khawthawng a, inkhel te a en a, tunah hian cognitive behavioural therapy-ah postgraduate a zir mek bawk.
Depression neiin, thih daih mai chak rum rum hunlai te pawh a nei, mahse, tunah chuan Janusz chuan a dinhmun leh a zir thiamna te chu midangte tanpui nan tangkai takin a hmang tawh zawk a ni.
Janusz hian 1993 khan a kum 18 tlin champha a thlen hma lawkin a motorcycle khalh lai leh truck an insu a, truck-ah na takin a va intauh a, a spinal cord a chhe ta a ni. Kum ruk chhung chu ICU-ah enkawl a ni a, chumi hnuah an chenna inah ventilator te dahin in lama inenkawl turin a haw ve thei ta chauh a ni.
Kum tam tak depression nasa tak neiin, 2007 khan a treatment chu tihtawp a thih mai dilna a thlen ta a, hei hian Poland ram pumah euthanasia dan anga phal chung changah inhnialna a chawk chhuak nghe nghe a ni. Hemi hnuah hian media lamin an ngaihven ta hle a, mihrang hrang hnen atanga tanpuina a dawn phah ta a ni.