Tui pik rei thei ber record siam

Tui hmuam teuh la, engtia rei nge i pik theih? Chinese tui pik rei theim Ma Hui, kum 35, chuan khaihlak awm miah lovin minute 5 leh second 51.88 a rei a pik char char thei a, Guinness World Record a siam.
Ma Hui hian tui litre 4.5 a in hmasa te te a, chumi hnuah insangmarin a ka khat thei ang berin tui a hmuam leh a, chu chu a pik ta char char mai a ni. A ka atanga tui a chhuah tawh chuan khaihlak awm miah lo tur a ni a, a khaih lak zeuh chuan a tawpna chinah khan a pik rei zawng chhinchhiah tur a ni.
A hmaa hetiang record chu Ethiopian Kirubel Yilma’n kum 2016-a a siam niin, ani hian second 56.36 a rei a pik thei a, Kirubel hmaa record siamtu chu Ghanian Dickson Oppong aka’ Waterman’ a ni a, ani hian 2011-14 khan ama record a khum zak zak a, a record hnuhnung ber chu second 4.86 a ni. Ma Hui hian a tihdan tê a thiam a ni ngei ang, a pik rei thei bik khawp mai.
Hetianga tui inpik rei siak hi kum 17-na lai vel atanga an lo chin tan tawh a ni a, tui an in teuh a, chu chu tihrawl control-in engtin emaw tak rei deuh bik an pik thei thin. Hetianga tui pik rei thei hriat hlawh hmasa te chu Hadji Ali (1887-1937), Mac Norton aka ‘The Human Aquarium’ te an ni a, magician David Blaine pawh hian hetiang lamah hian thiam thil a nei nual a, ani hian tui chhunga thaw loa awm rei thei ber record siamin, minute 17 leh second 4.4 a rei a awm thei.