Ram, hnam leh sakhaw himna ngaipawimawh tur thlang ang u – MKHC
Mizoram Kohhran Hruaitute Committee chuan Lok Sabha inthlanpuiah kan ram, hnam leh sakhaw himna ngaipawimawh tur mi thlanchhuah tum turin mipui an ngen. Lok Sabha inthlanpui 2024 puala Mizoram Kohhran Hruaitute Committee (MKHC) in thuchah a siamah zalen tak leh duhthlanna dik hmanga mitinin vote an thlak theih nan, hel pawl leh ralthuam lam chi hman, invau, inbum, sum sem tih loh nise, an ti a. Vote nei zawng zawngin kan mawhphurhna a nih ang taka vote thlak vek nise; hnam bil zawng, khawtlang inpumkhatna leh kohhran inunauna tichhe zawngin eng pawl mahin hma lak loh nise; mimal leh pawl insawichhiat vak vak, tharum thawhna chawk tho zawnga inelsen leh inauh nawmnahte tih loh nise; therhlo leh sum uma tumahin vote hralh loh nise, an ti. ‘Kan ram, kan hnam leh sakhaw himna ngaipawimawh tur mi thlanchhuah tum nise,’ an ti.
Thlantlin apiang chu MKHC chuan a mawhphurhna tha taka hlenchhuak thei turin duhsakna a hlan lawk tih a sawi a. Thlangtu mipui leh roreltua ruattu Pathian zah chunga ram leh hnam tan hna thawk tura chahin, ‘Party aiawh chauh in ni tawh loa, Mizoram mipui zawng zawng aiawha ding in nih inhrereng turin kan duh. Kan ram, kan hnam leh sakhaw himna ngaipawimawh reng turin kan beisei a. Kohhran leh pawl duhsak bik nei loa, angkhata an thu leh hla ngaihpawimawh sak tur leh kohhrante thawhpui theiha an awm kan duh,’ a ti
Thlangtu mipui pawhin thlantlin apiang chu kan ram tana Pathian min pekah pawmin sawisel ringawt loa tawiawma tawngtaipui zel turin MKHC chuan a chah bawk.
Lok Sabha inthlan denchhen hian April 13/14 hian mahni kohhran inkhawmah rampum huap tawngtai rual nei theuh turin an inngen tih a sawi a. Tawngtai thupui atan – Inthlan tluang taka kan neih theih nan leh Mizoram aiawhtu mi tha tak kan thlan chhuah theih nan; kan ramah sakhaw zalenna tha tak kan neih zel theih nan leh sakhaw pawl hrang hrangte intibuai loa, inrem taka kan awm zel theih nan; India ramah Kristian-te rawngbawlna nekchepna leh harsatna siam zawnga hmalakna a lo bo theih nan, tih te chu thupuia thlan a ni.