Alcaraz barakhaihtu Dimitrov

Ningani khan Grigor Dimitrov chuan champion tura rinkai top-seeded Carlos Alcaraz lakah 6-2, 6-4 hnehna changin Miami Open semi-final a lut a, US tournament lian pahnih kum khata Indian Wells leh Miami Open title lakawp theihna nihna ngiahsan hlawh Sunshine Double an tih chu Alcaraz hian a hlawhchhuak zo ta lo a ni.
Kum 2017 khan Roger Federer chu mipate zinga Sunshine Double la thei hnuhnungber a lo ni tawh a, Swiss hnungzui thei hnaivaiber chu kumin Indian Wells champion Spaniard Alcaraz hi niin, Ningani Miami Open mipa singles quarter-final match pakhatah rinkai zawk ni chungin last four a lut zo lo a, a hneh loh Dimitrov khan nizan result tarlan hman loh semi-final pakhat zawkah Alexander Zverev a hmachhawn zui leh.
Bulgarian 11th seed Dimitrov laka a tlawm hma ni 11 kalta mai khan world number two Alcaraz chuan Indian Wells title a hlawhchhuak a, inrintawkna sang tak nen Miami a pan a; Ningani last eight match-a minute 92 an inbeih hnuah a chak zo ta lo a, Sunshine Double a chang zo ta rih lo a ni.
12th-ranked Dimitrov nena final luh inchuh German fourth seed Zverev khan quarter-final inkhel dangah Hungary player Fabian Marozsan chu 6-3, 7-5-in a hneh.
Nizan mipa singles semi-final inkhel dangah Medvedev leh Sinner an intum ve bawk.