Lalhmangaiha Sailo
Holy Cross Bakery
9436360275
-- Advertisement --
Kum 70 dawn a lo ni reng tawh a lawm le, kum 1956 kuma Lunglei Govt High Sikul Pawl 10 (sawm) zir naupang 33 zinga la dam awmchhun mi 12 te chuan Dt 15.3.24 khan Pu Bualhranga in thar Dawrpui Bungkawn ah Re-Union hlimawm tak kan hmang a, kan Siniar-in kum 87 chunglam kan ni deuh vek tawh. Programme mumal tak buatsaihin nilengin Kan inpawl khawm a. Kawppui ten min tawiawm a. Remchang lo te chu an tu leh fa ten an rawn tawiawm a.
Kan zavaiin hun thawl tak hnuaiah (Sharing) hun kan hmang a, kan Head Master C. |huamluaia leh kan Class Master JK Kenglawta te ho a kan Pawl Thlalak te kan thlir ho a, kan Class Room a kan thut ho dan leh kan ninhlei theih thinzia te kan sawi a. Siamvelin, Bualhranga leh Saptawna ten an fiam nasat thin thu sawiin thiante angin ka hleitling ve si lo nen, min chawi sawn sek thin a’n tih phei chuan Buala te chhuat laiah Denghnunan i la rit viau lo maw tia an fiam leh te chu, kan hlimpui teh a sin. C Thanchungnungan Lunglei atanga Sharing Short Message of Sweet Memories a fanu, Mawitei kaltlanga a rawn thawn te kan chhiar chhuak a, lung a leng tlang a ni ang, kan hrut kim bawk a, sawi tha hlei thei lo, hnukulh teuhin kan sawi hlawm a.
Kan zinga tel ve ta lo Dr Thansiama nupui Zuali leh Lallunghnema IRS nupui Tluangtei te lo tel vein min ti hlimin hmun khawhar leh mi rama khawhar taka an awm laia an Paten an sawi zin tak Lunglei kan Class Room leh kan Farewell thu te an sawi a, kan hming an lam fo thin an thiante min han hmu an lawm thu leh an lung a len thu an sawi a. Kan nu te ho leh kan tu leh faten ngaihnawm tiin khawi mah tawlhsawn loin an awm a, an pi leh pu te message te an sawi ve nghe nghe a ni.
Kan Re-Union hlawhtlinna Pakhat chu maw!! Keini ho chhiatni, thatni pawha chhuak ngai tawh lo, mahni ina mut leh thut inchhawka awm nileng mai mai tawh thinte pawh khan, hemi ni hi chuan harsatna awm loin nilengin hlim takin kan inpawl khawm a, Bualhrangate nupain an Testemony ngaihnawm tak an sawi a, a tawpa an Pain Hla saa an Solo zui phei chu a ropuiin a hlimawm a, kan vaiin kan lam lo chauh a ni.
Tlaiah hlim takin Zanriah chaw kan kil ho a, chak lo leh thei tawh loa inngai kha rinai daihin kan lo la chak a, kan chawlak pawh a la ziaawm e. Hrisel, chakna leh damna te hi, ni tin tuk zana kan damdawi ei thin chauh hi a lo ni lo. Kan rilru leh ngaihtuahnate hi a lo ni, hetianga thian zahoa, hlim tak mai a, kan inpawl ho fo te hi a lo va tha em!! Kan ti. Hun remchang hmasa berah Programme buatsaih leh ngei nise te zuk la ti hlawm a.
Hetiang deuh hian, Agriculture, Horti leh Irrigation Officer Pension ho hian MAHIOPEN ti n nghet takin Pawl an din a, Constitution mumal tak neiin-registration thlap a ni a, Pawl thil tum leh hmalakna kawng engto tham a awm lo, kum engemaw chen lo thawk ho thin Pension hnu a, tlatna mual a lo dan in, kan inhre zui ta lo mai thin hi awm lo in, Membership fee pein kan lut zel a, Designation-in min ti buai lo a, member chak lo deuh leh damlote intanpuiin hruaituten member engemaw zat te nen khawhar loin an kan kual thin. Kal hmasa apiang kan inral a, nupui sun thlengin kan inral thin.
A hlimawm ber chu, kum tin intawh khawmna hun February thla hian kan nei ziah thin a, Ruai hlimawm taka buatsaih thin a ni. Zoram hmun hrang hranga agriculture leh horti hma lakna te tlawhin Field Visit kan nei thin a. Service hun laia kan sulhnu han fan leh na hun thawl tak neih thinte hi a hlimawmin a zawngchhangthlak tak zet zet a. Hei hian Pensioner te min tuai tharin, min ti chak suah thin. Heng kan kalphungte hian MUP, Pensioner leh kawng danga kan activities te min tibuai lova, Kan Service hun lai aimahin kan Pension hnu rei fe thlengin He MAHIOPEN – Kan Pawl hian min Pawtkhawm hnaiin, kan hlim thin khawp a ni.