Aizawlah NSS Festival nei

April 2-6 chhung hian Aizawlah North East NSS Festival neih mek a ni a. Regional Directorate of NSS Guwahati leh State NSS Cell Mizoram buatsaih tangdun huaihawt a ni.
April 2 kha North East State 8 – Arunachal Pradesh, Assam, Manipur, Meghalaya, Mizoram, Nagaland, Sikkim leh Tripura atangin NSS (National Service Scheme) volunteer 280 leh programme officer 20 velte thlen kim ni a ni a. April 3 khan Festival hi Mizoram University vice chancellor Prof Dibakar Chandra Deka chuan a hawng.
MZU vice chancellor bakah NSS Regional Director Guwahati hotu Jangjilong leh Mizoram State NSS officer F Sangvuana ten thu an sawi a. NSS volunteer hrang hrangin an hnam lam leh theihna hrang hrang an entir a ni.
NE NSS Festival neih chhung hian thupui hrang hrang hmanga inzirtir a nih dawn bakah cultural programme, sightseeing leh social work neih tur a ni.
Tun dinhmunah Mizoramah University leh college hrang hrangah NSS Unit dinna 29 a awm a; higher secondary-ah NSS Unit dinna school hi 71 awmin, NSS volunteer hi Mizoramah 30100 an awm mek.